ԵՐԵՎԱՆ, 14 դեկտեմբերի – Sputnik. Երևանի «Աստղիկ» բժշկական կենտրոնում քիչ առաջ ավարտվեց Հայաստանում երկրորդ չափահաս պացիենտի լյարդի փոխպատվաստումը։ Այս մասին նշված է բուժկենտրոնի facebook–յան էջում։
«23-ամյա աղջիկն իր լյարդի մի մասը նվիրաբերել է 24-ամյա քրոջը, որը լյարդի ցիռոզ ուներ»,–նշված է հաղորդագրության մեջ։
Վիրահատությունը, որը տևել է 8,5 ժամ, կատարել է նույն թիմը, որը մի քանի ամիս առաջ իրականացրել էր լյարդի առաջին փոխպատվաստումը Հայաստանում, մասնավորապես՝ «Աստղիկ» ԲԿ-ի՝ վիրաբուժական գծով փոխտնօրեն, պրոֆեսոր Հայրապետ Բարսեղյանը, վիրաբուժական բաժանմունքի ղեկավար, բգթ, դոցենտ Արայիկ Ոսկանյանն ու վիրաբուժական բաժանմունքի ամբողջ թիմը։
Դու մենակ չես. ինչպես ծանր հիվանդությունը Հրանտին երազանք ու մեծական ցանկություն նվիրեց
Հայ մասնագետների հետ աշխատել է նաև ՌԴ Բուռնազյանի անվան պետական բժշկագիտական կենտրոնի վիրաբուժական կլինիկայի ղեկավար, պրոֆեսոր Սերգեյ Ոսկանյանը, որը Երեւան է ժամանել վիրահատությանն աջակցելու նպատակով։
Այժմ թե՛ դոնորը, թե՛ ռեցիպիենտը գտնվում են ինտենսիվ թերապիայի բաժանմունքում, նրանց վիճակը կայուն է։
Կյանքի ու մահվան սահմանագծին. դիակային փոխպատվաստում. մարդիկ «այո» կասե՞ն ճիշտ պահին
