ԵՐԵՎԱՆ, 26 դեկտեմբերի — Sputnik. Ռուսական «Ազիմուտ» ընկերությունն իրականացրել է Երևան–Սոչի–Երևան առաջին չվերթը «Զվարթնոց» միջազգային օդանավակայանից։
Առաջին ուղևորին սպասում էր ավիաընկերության ավանդական անակնկալը` անվճար թռիչք երկու ուղղությամբ, որը հանդիսավոր պայմաններում օդանավակայանում հանձնեց ավիաընկերության ներկայացուցիչ Բարսեղ Բարսեղյանը։
«Չվերթը կիրականացվի շաբաթական երեք անգամ։ Մենք ապագայի մեծ ծրագրեր ունենք, 2021թ–ին մտադիր ենք թռիչքներ կատարել 12 ուղղություններով, որոնցից 8–ը նոր են։ Նախատեսում ենք տարեկան 480 հազար ուղևոր տեղափոխել», – ասաց նա։
Բարսեղյանը պատմեց, որ օդանավակայանը ավիաընկերության սպասարկման համար զեղչեր է տրամադրել։
Հայաստանից 10 նոր ուղղությունով չվերթեր կբացվեն. առաջինը կլինի ռուսական «Ազիմուտը»
«Պետական տուրքի մասին» օրենքում փոփոխությունների համաձայն` առաջարկվում է նոր և արդեն գործող ավիափոխադրողներին երեք տարով հարկային արտոնություններ տրամադրել, եթե դրանք նոր ուղղություններ բացեն։ Նոր ուղղությունների համար չեղարկվել է «օդի հարկը», որը գանձվում է 1997թ–ից և կազմում է 10 հազար դրամ։
Ավիաընկերության տնօրենը կարծում է, որ «օդի հարկը» տոմսերի բարձր գների պատճառով խանգարել է բիզնեսի զարգացմանը և խոչընդոտել զբոսաշրջային հոսքին։
Հայաստանի երկնքում նոր ավիափոխադրող կհայտնվի՞
«Հուսով եմ` շուտով այդ հարկը կվերացվի ոչ միայն նոր, այլ նաև արդեն գործող ուղղությունների համար», – եզրափակեց նա։
