ԵՐԵՎԱՆ, 9 հունվարի — Sputnik. Եթե անհրաժեշտ լինի, որ Հայաստանը միջնորդի Իրան-ԱՄՆ հարաբերությունների կարգավորման համար, ապա ՀՀ–ն պատրաստ է դա անել։ Կառավարության նիստից հետո այս մասին լրագրողներին ասաց Անվտանգության խորհրդի քարտուղար Արմեն Գրիգորյանը` անդրադառնալով Իրան–ԱՄՆ հարաբերություններին։
Արդեն հայտնել էինք, որ ԱՄՆ նախագահ Դոնալդ Թրամփի անձնական կարգադրությամբ Իրաքում իրականացված ռազմական գործողության հետևանքով հունվարի 3-ին Բաղդադում սպանվել է ԻԻՀ պատմության մեջ ամենաազդեցիկ մարդկանցից մեկը՝ գեներալ-մայոր Ղասեմ Սոլեյմանին։
Դրանից հետո լարվել են Իրան–ԱՄՆ հարաբերությունները։
«Ճիշտ է, երկու երկրների միջև հարաբերությունների կարգավորման համար միջնորդ լինելու տարբերակը չի քննարկվել, սակայն անհրաժեշտության դեպքում` պատրաստ ենք նաև դրան։ Հայաստանը շարունակելու է երկխոսությունն Իրանի և ԱՄՆ–ի հետ` երկու երկրների հարաբերությունների կարգավորման համար»,–ասաց Գրիգորյանը։
Իրանում ավիավթարից մեկ օր առաջ ուկրաինական ինքնաթիռը Երևանում է եղել
Նրա գնահատականով` իրավիճակն արդեն իսկ կայունության է գնում։ Չնայած դրան` Հայաստանը պատրաստվել է վատթարագույն սցենարներին, մշակվել են տարհանման, ինչպես նաև ճգնաժամին արձագանքելու պլաններ։
Գրիգորյանը վստահեցնում է` Հայաստանն անգամ վատ սցենարի դեպքում տնտեսական անվտանգության առումով որևէ խնդիր չի ունենա. 2019–ին տնտեսության գրանցած տվյալներն ինքնավստահություն են տալիս։
Հայտնի է ուկրաինական ինքնաթիռի կործանման պատճառը
Ավելի վաղ ՀՀ վարչապետ Նիկոլ Փաշինյանն անդրադարձել էր Իրան-ԱՄՆ հակամարտության սրմանն ու երկու երկրներին կոչ արել զերծ մնալ այնպիսի քայլերից, որոնք կվատթարացնեն իրավիճակը տարածաշրջանում։
ՀՀ արտգործնախարար Զոհրաբ Մնացականյանն էլ իրանցի գործընկերոջ` Ջավադ Զարիֆի հետ հեռախոսազրույցում ընդգծել էր, որ Հայաստանը պատրաստակամ է շարունակելու սերտ համագործությունն իր բոլոր գործընկերների հետ տարածաշրջանային կայունության և անվտանգության ուղղությամբ:
Հիշեցնենք, որ Իրանի և ԱՄՆ հարաբերությունները սրվել են Իրանի Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սոլեյմանիի սպանությունից հետո։ Ղասեմ Սոլեյմանին սպանվել է հունվարի 3-ին Բաղդադում։
Սոլեյմանիի հրաժեշտի արարողության ժամանակ տասնյակ մարդիկ են մահացել. ԶԼՄ
Գեներալի սպանությունից հետո Իրանի ԱԳՆ է կանչվել Շվեյցարիայի դեսպան Մարկուս Լեյթները, որը ներկայացնում է ԱՄՆ շահերը Թեհրանում:
Իրանցի գեներալի սպանությունից հետո ԱՄՆ Զինված ուժերը բարձր մարտունակության են բերվել: Իրանի գերագույն հոգևոր առաջնորդ Այաթոլլահ Ալի Խամենեին խոստացել է վրեժ լուծել Իսլամական հեղափոխության պահապանների կորպուսի «Ղոդս» հատուկ ստորաբաժանման ղեկավար, գեներալ Ղասեմ Սոլեյմանիի սպանության համար:
