ԵՐԵՎԱՆ, 15 հունվարի – Sputnik. «Դալմա Գարդեն մոլը» կվերսկսի իր բնականոն աշխատանքը 7-10 օրվա ընթացքում, երբ պատրաստ կլինի պետական մարմիններից գրավոր եզրակացությունը: Այս մասին հայտնում է առևտրի կենտրոնի Facebook-ի էջը։
««Դալմա Գարդեն մոլը» հավատարիմ է մնում իր արժեքներին, ղեկավարությունը կշարունակի գործել՝ ելնելով իր հաճախորդների և գործընկերների շահերից և կվերսկսի իր բնականոն աշխատանքը 7-10 օրվա ընթացքում, երբ կունենանք պետական մարմիններից գրավոր եզրակացություն»,- նշված է առևտրի կենտրոնի տարածած հաղորդագրության մեջ։
Աղբյուրի հաղորդմամբ` «Դալմա Գարդեն մոլի» նախաձեռնությամբ Մոսկվայից հրավիրված մասնագետները շենքի տարածքում մանրակրկիտ ուսումնասիրություն են անցկացրել, որոնց տրված բանավոր եզրակացությունների համաձայն՝ շենքը ոչ մի կառուցվածքային կամ մտահոգություն առաջացնող խնդիր չունի։ Միևնույն ժամանակ ղեկավարությունը դիմել է պետական մարմիններին գրավոր եզրակացություն ստանալու համար։
Իրարանցում «Դալմա գարդեն մոլում»` մարդկանց տարհանում են. ԱԻՆ-ը պնդում է` կեղծ խուճապ է
Հիշեցնենք` հունվարի 9-ին առևտրի կենտրոնում արտակարգ իրավիճակ էր ստեղծվել. շենքից տարհանել էին բոլորին, քանի որ ցնցումներ էին գրանցվել։ Sputnik Արմենիային ՀՀ արտակարգ իրավիճակների նախարարի մամուլի քարտուղար Էդմոն Զարգարյանը հայտնել էր, որ ինչ-որ մեկը կեղծ տեղեկություն է տարածել, թե երկրաշարժ է լինելու։ ԱԻՆ աշխատակիցներն այցելել էին առևտրի կենտրոն ու մարդկանց զգուշացրել, որ երկրաշարժի լուրերը չեն համապատասխանում իրականությանը։
