ԵՐԵՎԱՆ, 23 հունվարի — Sputnik. ԱԱԾ նախկին տնօրեն Արթուր Վանեցյանի ներկայացուցիչներ Լուսինե Սահակյանը և Արամազդ Կիվիրյանը «Հայկական ժամանակից» պահանջում են Արթուր Վանեցյանի վերաբերյալ ստահոդ, զրպարտություն հանդիսացող և անհեթեթ տեղեկությունները հերքել։ Տեղեկությունը Facebook-ի իր էջում հայտնել է Լուսինե Սահակյանը։
«www.armtimes.com կայքում հրապարակվել է «Պատիվ ունե՞մ, թե՞ պատիվ չունեմ...» վերտառությամբ նյութ: «Զանգվածային լրատվության միջոցների մասին» ՀՀ օրենքի պահանջների համաձայն` նշված լրատվամիջոցին հերքման պահանջ է ուղարկվել։ Օրենքով սահմանված ժամկետում հերքումը չհրապարակելու դեպքում, ստիպված ենք լինելու համապատասխան հայց ներկայացնել դատարան»,–գրել է Սահակյանը։ Նա կից ներկայացրել է հերքման տեքստն ու լրատվամիջոցին ուղղված գրությունը։
Հիշեցնենք, որ ՀՀ վարչապետ Նիկոլ Փաշինյանի դուստրը` Մարիամ Փաշինյանը, Facebook-ի իր էջում գրել էր, որ կարոտով է հիշում Վանեցյանների ընտանիքի հետ ջերմ շփումը, սակայն ցավում է, որ այդ ջերմությունը փոխադարձ չի եղել, և Վանեցյանը դավադրություններ է կազմակերպել իրենց ընտանիքի դեմ:
Նա իր էջում` գրառմանը կից, տեղադրել էր «Հայկական ժամանակ» թերթի «Պատիվ ունե՞մ, թե՞ պատիվ չունեմ. Միշիկը, Արթուրը, Արիկը» վերնագրով հոդվածը, որտեղ, մասնավորապես, նշվում է, որ Փաշինյանի ընտանիքի, մասնավորապես` Մարիամ Փաշինյանի և Աննա Հակոբյանի դեմ արվող հակաքարոզչությունը նաև ֆինանսավորում է Վանեցյանը: «Միակ հարցը, որ ամբողջական պատասխան դեռ պիտի ստանա հետևյալն է`արդյո՞ք Ա. Վանեցյանն այդ գործունեությունը սկսել է դեռ ԱԱԾ տնօրեն եղած ժամանակ: Ըստ ամենայնի` այո»,–գրում է թերթը:
Հոդվածին անմիջապես արձագանքել էր Վանեցյանը։ Նա իր հասցեին մեղադրանքներն ապատեղեկատվություն էր որակել և հայտարարել էր, որ այդ կեղծիքն անպատասխան չի մնա։
Կենցաղային խոսակցություն է. Արարատ Միրզոյանը` Փաշինյան–Վանեցյան ընտանիքների բանավեճի մասին
Վանեցյանի խոսքով ` հրապարակման մեջ իրեն վերաբերող բոլոր դիտարկումներն ու ենթադրությունները ծայրից ծայր սուտ են, իսկ դրան հաջորդած շահարկումներն ու ֆեյքային հարձակումները՝ արդեն սովորական:
Վանեցյանը նաև Մարիամ Փաշինյանին խորհուրդ էր տվել Մարիամին չխառնվել մեծերի անհասկանալի խաղերի մեջ։
Հիշեցնենք` սեպտեմբերի 16-ին, ՀՀ վարչապետ Նիկոլ Փաշինյանը հայտնեց, որ ստորագրել է Վանեցյանի հրաժարականի միջնորդությունը։
