ԵՐԵՎԱՆ, 26 հունվարի – Sputnik. ԱԱԾ նախկին տնօրեն Արթուր Վանեցյանը Twitter-ի իր միկրոբլոգում գրառում է կատարել, որում նշել է, որ երկրի անվտանգությունը վեր է ամեն ինչից, որի հիմքում չեն կարող լինել չմտածված որոշումներ ու էմոցիոնալ պոռթկումներ:
«Հուզական, ագրեսիվ առաջնորդությունը վտանգներ է պարունակում և կարող է հանգեցնել խիստ անցանկալի հետևանքների: Երկրի անվտանգությունը վեր է ամեն ինչից ու յուրաքանչյուրից, և այն չի կարող հիմքում ունենալ չմտածված որոշումներ ու էմոցիոնալ պոռթկումներ: Ամեն ինչ անլրջացնելն անթույլատրելի է»,- գրել է նա։
ՀՀ վարչապետ Նիկոլ Փաշինյանը երեկ Կապանում կայացած ասուլիսի ժամանակ պատասխանելով հարցին` արդյո՞ք մտավախություն ունի, որ Վանեցյանը կխոսի, ՀՀ վարչապետն ասաց` նմա՞ն եմ մեկին, որը կարող է մտավախություն ունենալ ԱԱԾ նախկին տնօրեն Արթուր Վանեցյանի «ասելիքներից»։
Վանեցյանի ներկայացուցիչները հերքում են պահանջել, հակառակ դեպքում կդիմեն դատարան
Փաշինյանը հիշեց «Կարգի հաղորդման» սերիաներից մեկը, որում հերոսն ասում է, թե ամեն ինչ գիտի, բայց վերջում հայտնվում է հիմար վիճակում։ Նա նշեց, որ բոլոր նրանք, ովքեր ասում են` ամեն ինչ գիտեն, այդօրինակ սկեչի հերոսներ են։
Հարցին, թե Վանեցյանի աշխատանքից ազատվելն ինչո՞վ էր պայմանավորված` Փաշինյանը պատասխանեց, որ եթե նայեն «Կարգին հաղորդման» իր հիշատակած սերիան, ապա այդ հարցի պատասխանը նույնպես կստանան։
Հիշեցնենք, որ 2019–ի սեպտեմբերի 16-ին Փաշինյանը հայտնեց, որ ստորագրել է ԱԱԾ տնօրեն Արթուր Վանեցյանի հրաժարականի միջնորդությունը։ Դրան հաջորդեց Վանեցյանի հայտարարությունը, իսկ ավելի ուշ ՀՀ նախագահ Արմեն Սարգսյանը ստորագրեց հրամանագիրը։ Դրանից հետո Փաշինյան–Վանեցյան հարաբերությունները սրվեցին, քանի որ Վանեցյանն իր հայտարարության մեջ նշել էր` թող իր հրաժարականը լինի «Կանգ առ»-ի սթափեցնող կոչ։
