ԵՐԵՎԱՆ, 31 հունվարի — Sputnik. Հայաստանյան հանրային մուլտիպլեքսում հեռարձակվող բոլոր հեռուստաընկերությունները, բացի «Հանրայինից», «Շողակաթից» ու «МИР»–ից, այս տարի կարող են զրկվել եթերից։ Ինչպես Sputnik Արմենիային հայտնեց Հեռուստատեսության ու ռադիոյի հանձնաժողովի նախագահ Տիգրան Հակոբյանը, հանձնաժողովն այս տարի մրցույթ է հայտարարելու հանրային մուլտիպլեքսում հեռարձակվող հեռուստաընկերությունների համար։
«Նախորդ մրցույթում հաղթած հեռուստաընկերություններն իրենց լիցենզիաները ստացել են 10 տարով, և այս տարի այդ ժամկետը լրանում է։ Բոլոր կապուղիներն ազատվում են, և ցանկացած հեռուստաընկերություն այդ մրցույթին մասնակցելու իրավունք ունի», - ասաց նա։
Հակոբյանը չհերքեց, որ այս կերպ Հայաստանում այսօր գործող բոլոր մասնավոր հեռուստաընկերությունները, փաստորեն հայտնվել են փակման վտանգի առաջ։
ՀՌՀ նախագահի համոզմամբ` հանրային մուլտիպլեքսում ներառված հեռուստաընկերություններին ներկայացվող պահանջները պետք է խստացվեն, մոտեցվեն եվրոպական չափանիշներին։
Մելիքյան. «Լրատվամիջոցը կոշիկ կարելու ֆաբրիկա չէ, այն գործ ունի մարդկանց մտքի ու սրտի հետ»
«Նրանք պետք է անաչառ լրատվություն ապահովեն։ Նրանք պետք է ծրագրերի բազմազանություն ապահովեն` լրատվական, մանկական, ուսումնական, և, եթե այդ կարգավորումները լինեն, ու հեռուստաընկերությունները համաձայն լինեն պահպանել այդ բոլոր չափորոշիչները, ապա, բոլորն, իհարկե, ազատ կլինեն։ Իսկ այն հեռուստաընկերությունները, որոնք իրենց գործունեությունը դիտում են լոկ որպես բիզնես, ապա նրանք կարող են այդ սահմանափակումների հետ չհամաձայնել ու գնալ կաբելային ցանցեր կամ որևէ այլ մասնավոր մուլտիպլեքս»,– պարզաբանեց Հակոբյանը։
Հեռուստաալիքների համար նոր մրցույթները, ՀՌՀ նախագահի խոսքով, հայտարարվելու են 2020թ–ի հունիսի 20-ին, արդյունքները ամփոփվելու են 2021թ–ի հունվարին։
Մովսեսյան. «Հեռուստատեսության հաճախականությունների մրցույթին կմասնակցենք նոր ծրագրերով»
Դրան զուգահեռ կառավարությունում նաև «Հեռուստատեսության ու ռադիոյի մասին» նոր օրենք է մշակվում։ ՀՌՀ նախագահը չբացառեց, որ նոր օրենքով կլինեն նոր կարգավորումներ, ու այդ դեպքում հեռուստաընկերություններին լրացուցիչ ժամանակ կտրվի խաղի նոր կանոններին հարմարվելու համար։
«Այդ դեպքում միգուցե կես տարով կամ մեկ տարով այդ մրցույթների ժամկետները հետաձգվեն, որպեսզի Հայաստանում գործող բոլոր հեռուստաընկերությունները կարողանան նախապատրաստվել մրցութային նոր կանոններին»,– ասաց նա։
Առանց մրցույթի իրենց կապուղիները կշարունակեն տնօրինել միայն «Հայաստանի Հանրային» և «Շողակաթ» հեռուստաընկերությունները, որոնք գործում են հանրային հեռարձակողի սկզբունքով` առանց արտոնագրի, ինչպես նաև «МИР» միջպետական հեռուստաընկերությունը, որը Հայաստանում հեռարձակվում է միջպետական պայմանագրի հիման վրա։
Ռադիոընկերությունները Հայաստանում դեռ կշարունակեն աշխատել առանց մրցույթի, քանի որ ռադիոհաճախականությունների վերջին մրցույթն անցկացվել է 2017թ–ին, որի հիման վրա 18 մասնավոր ռադիոընկերություն ստացել է 10 տարվա արտոնագիր։
Բայց, քանի որ Հայաստանում այսօր էլ առկա են ազատ FM հաճախականություններ, Հակոբյանը չի բացառում, որ նոր օրենքով այդ ոլորտը կազատականացվի ու ազատ հաճախականություններն առաջիկայում կբաշխվեն նոր ռադիոընկերությունների միջև։
«Ա1+»–ը դատի է տալիս կառավարությանն ու փորձում է ստանալ «Կենտրոն» TV-ի հաճախականությունը
Հիշեցնենք` «Ա1+» հեռուստաընկերության տնօրեն Մեսրոպ Մովսիսյանը 2019թ–ի դեկտեմբերին լրագրողների հետ հանդիպմանը հայտնել էր, որ «Ա1+»–ը պատրաստվում է մասնակցել 2020թ–ին հայտարարվող հեռուստակապուղիների մրցույթին։
Որևէ այլ հեռուստաընկերություն այս պահին մրցույթին մասնակցելու մտադրության մասին չի հայտարարել ու պաշտոնական հայտ չի ներկայացրել։
