ԵՐԵՎԱՆ, 5 փետրվարի - Sputnik. Երևանի կենդանաբանական այգում 2 ուղտերից մեկը սատկել է: Այս տեղեկությունը Sputnik Արմենիայի թղթակցի հետ զրույցում հաստատեց Կենդանաբանական այգու տնօրենի ժամանակավոր պաշտոնակատար Վլադիմիր Սիմոնյանը:
«Ուղտն իսկապես սատկել է: Առաջիկայում մենք կհրապարակենք կենդանու անկման պատճառները և կտանք բոլոր հարցերի պատասխանները», - ասաց նա:
Կենդանաբանական այգու մեր աղբյուրը հայտնեց, որ ուղտը սատկել է հանգստյան օրերին:
«Կենդանին հիվանդացել էր, վիճակը կրիտիկական էր: Դա ակնհայտ զգացվում էր կենդանու արտաքին տեսքից»,– ասաց մեր աղբյուրը:
Ըստ շրջանառվող լուրերի` 2019 թվականի դեկտեմբերին Երևանի կենդանաբանական այգում ևս մի քանի տեսակի կենդանիներ են սատկել` խոճկորներ, փասիան, մողես: Այս մասին Երևանի կենդանաբանական այգու պաշտոնական կայքէջում որևէ տեղեկություն չկա։
Նշենք, որ 2018 թվականից ի վեր Երևանի կենդանաբանական այգին պարբերաբար հայտնվում է սկանդալների կիզակետում: 2018-ին կենդանաբանական այգում զեբր, արջ, կոկորդիլոս, բեզոարյան այծ և վագր են սատկել: 2019-ի ապրիլի 29-ին սատկեց ևս մեկ վագր՝ Բինգո անունով:
Ըստ պաշտոնական հայտարարության` անցյալ տարի երեք կենգուրու և երեք մուֆլոն թափառող շների զոհ են դարձել:
Հիշեցնենք` նոյեմբերի 1-ին կենդանաբանական այգու տնօրեն Ռուբեն Խաչատրյանը հրաժարականի դիմում ներկայացրեց:
