ԵՐԵՎԱՆ, 5 փետրվարի — Sputnik. Ալեն Սիմոնյանն առաջարկում է Հայաստանում արգելել առանց արմատի եղևնիների և սոճիների վաճառքը` նոյեմբերի 1-ից հունվարի 1-ն ընկած ժամանակահատվածում։
Այդ նպատակով նախ առաջարկում է համապատասխան փոփոխություններ կատարել «Առևտրի ու ծառայությունների» և «Վարչական իրավախախտումների վերաբերյալ» ՀՀ օրենքներում։
«Խնդիրը հետևյալն է, որ գրում են` «բերել ենք 100 հատ ծառ», ճանապարհին այդ 100 ծառին ավելանում է Հայաստանում հատված ևս 200-ը, ու վաճառվում է»,– ասաց Սիմոնյանը` ԱԺ տնտեսական հարցերի հանձնաժողովի նիստում ներկայացնելով իր առաջարկը։
ԱԺ փոխնախագահն առաջարկն հիմնավորեց վիճակագրությամբ, որի համաձայն, 2017թ–ին Հայաստան է ներկրվել 188 հատ և 11 000 կգ, 2018-ին` 65 500 կգ և 2019թ–ին` 22 500 կգ հատված եղևնի ու սոճի։
«Իրականում այս ծառերը ամբողջը աղբ են, բերել ենք մեր երկիր` 10 օրվա համար, վրան մի հատ զանգուլակ ենք կախել ու նետել ենք աղբը»,- ասաց Սիմոնյանը` պատգամավորներին ցույց տալով ձեռքի տեղեկանքը։
Բնական եղևնի ընտրելու գաղտնիքը. ինչպես խուսափել «սխալ» տոնածառից
Արմատով ներկրված ծառերը, նրա խոսքով, անգամ Ամանորից հետո ոչ թե աղբը կնետեն, այլ կտնկեն։
Նիստին ներկա ՀՀ տարածքային կառավարման և ենթակառուցվածքների նախարարի տեղակալ Վաչե Տերտերյանն առաջարկեց արգելել ոչ միայն վաճառքը, այլև ներկրումը և ոչ միայն Ամանորին ընդառաջ, այլ ամբողջ տարվա ընթացքում։
Եղևնին ` Ուրարտուից մինչև ԽՍՀՄ
«Մենք ասում ենք այս տեսքով ընդունելուց ձեռնպահ մնալ, և շարունակել քննարկել»,– ասաց Տերտերյանը։
Քննարկման արդյունքում որոշվեց հարցի քվեարկությունը հետաձգել ու համատեղ վերանայել օրենսդրական առաջարկը։
