ԵՐԵՎԱՆ, 24 փետրվարի – Sputnik. Երևան ավագանու «Իմ քայլը» խմբակցության անդամ Աննա Ջավախյանը Facebok սոցիալական ցանցի իր էջում հայտնել է, որ Երևանում գործող մանկապարտեզների սաների բացակայությունը հարգելի կհամարվի։
«Փետրվարի 13-ին քաղաքապետին դիմել էի հիվանդության համար տրվող հարգելի բացակաների սահմանափակումը վերանայելու առաջարկով։ Եվ ահա արդեն ունեմ պատասխանը։ Առաջարկը մերժվել է։ Այդուամենայնիվ, պատասխանի մեջ հստակ նշվում է, որ «նախադպրոցական ուսումնական հաստատությունների պատասխանատուներին հանձնարարվել է մանկապարտեզներ հաճախող երեխաների բացակայություններն այս շրջանում համարել հարգելի՝ հաշվի առնելով սեզոնային հիվանդությունների հանգամանքը»»,– գրել է նա։
Ջավախյանը հիշեցրել է, որ անկախ ամեն ինչից, միշտ պետք է հիշել, որ ՀՀ սահմանադրությամբ և օրենսդրությամբ է ամրագրված, որ յուրաքանչյուր երեխա ունի կրթության իրավունք։
12 երեխա ունեցող Բեժանյանները միայն մեկ երազանք ունեն. տեսանյութ
«Եթե որևէ երեխայի հարգելի բացակաների հետևանքով դուրս կթողնեն մանկապարտեզից, դիմեք համայնքի քաղաքապետարան, մարզերի դեպքում՝ նաև մարզպետարան, ԿԳՄՍ նախարարություն»,– նշել է նա։
Ջավախյանը հրապարկել է նաև քաղաքապետ Հայկ Մարությանին ուղղված դիմումը, որում է, որ վերջին շրջանում շատ բողոքներ է ստանում մանկապարտեզ հաճախող երեխաների ծնողներից, որոնք անհանգստանում են 2019 թ– ի ուսումնական ընդառաջ սահմանված բացակայությունների նոր թվի սահմանափակումները։
Մանկապարտեզի և ծնողի միջև կնքվող պայմանագրում ասվում է. «Երեխայի ընդունման օրվան հաջորդող օրվանից հաշված` մեկ տարվա ընթացքում նրա տեղը պահպանվում է ընդամենը 40 օր` ըստ ներքոհիշյալ դեպքերի` օրերը միասին հաշված.
– հիվանդության և բուժման օրերը` համապատասխան բժշկական տեղեկանքի առկայությամբ
– արգելափուլի (կարանտինի) օրերը, ինչպես նաև աշխատանքային 35 օր անընդմեջ կամ մասերով` երեխայի արձակուրդի դեպքում (ծնողի դիմումի առկայություն)` վերը նշված դեպքերով երեխայի բացակայության օրերը չհաշված»։
«Հատկապես մանկապարտեզ նոր հաճախող երեխաները հաճախ են հիվանդանում։ Հիվանդությունների համար հատկացվող 40 օրերը շատ արագ լրանում են, և տարվա կեսից արդեն երեխաները կանգնում են մանկապարտեզից դուրս մնալու խնդրի առաջ։ Այդ սահմանափակման հետևանքով ծնողները ձգտում են դեռ ամբողջովին չապաքինված երեխաներին օր առաջ տանել մանկապարտեզ, որպեսզի չլրացնեն թույլատրելի բացակաների քանակը»,– գրել է Ջավախյանը Մարությանին։
Քաղաքապետարանի պատասխանում նշված է, որ նախադպրոցական հաստատությունների պատասխանատուներին հանձնարարվել է մանկապարտեզներ հաճախող երեխաների բացակայություններն այս շրջանում համարել հարգելի` հաշվի առնելով սեզոնային հիվանդությունների հանգամանքը։
Երեխան չի ուզում խառատ կամ եռակցող դառնալ. կրթության առաջարկն ու պահանջարկը չեն համընկնում
