ԵՐԵՎԱՆ, 26 փետրվարի — Sputnik. Սահմանադրական փոփոխությունների հանրաքվեի տարբերանշանի հետ կապված տհաճ իրավիճակ է ստեղծվել։ Բանն այն է, որ համացանցում տարածվել է 1991թ.–ի Անկախության հանրաքվեի տարբերանշանը, որի ճիշտ նմանությամբ երեկ «Քաղաքացիական պայմանագրի» դրամահավաք-երեկոյի ընթացքում էլ ընդունվել է «Այո»–ի շտաբի տարբերանշանը։
Գերածախս չի լինի. Պապիկյանն ասաց` ինչքան գումար է հավաքվել «Այո»–ի դրամահավաք-երեկոյին
«Այո» քարոզչության կողմի լիազոր ներկայացուցիչ, «Իմ քայլի» պատգամավոր Վահագն Հովակիմյանը Sputnik Արմենիայի հետ զրույցում ասաց, որ խնդրի մասին իմացել են համացանցում բարձրացած աղմուկից։
«Տեսել ենք, զբաղվում ենք։ Եթե ապացուցվեց, որ կրկնօրինակն է, ՔՊ-ն հայտարարությամբ հանդես կգա»,–ասաց նա` ավելացնելով, որ հետագա գործողությունները կախված են եղածի հաստատումից կամ հերքումից։
Հարցին Facebook-ի իր էջում անդրադարձել է նաև ՀՀ փոխվարչապետ Տիգրան Ավինյանը։
«Փնտրվում է բնօրինակի հեղինակը»,–գրել է նա` հրապարակելով 1991-ի տարբերանշանը։
Ավինյանի գրառմանն արձագանքող օգտատերերը գրել են, որ այն տպագրվել է «Երեկոյան Երևան» թերթի` 1991թ–ի սեպտեմբերի 23-ի համարում:
Նշենք, որ «Այո»–ի այս տարբերանշանի համար վճարվել էր 3 մլն դրամ։
