ԵՐԵՎԱՆ, 27 փետրվարի — Sputnik. Ռուսաստանը «Եվրատեսիլ 2020» միջազգային երգի մրցույթում կներկայացնի ուկրաինացի երգիչ Ալեքսանդր Պանայոտովը։ Տեղեկությունը հայտնում է Starhit–ը` հղում անելով սեփական աղբյուրներին։
Լուրը դեռ պաշտոնապես չի հաստատվել, բայց հերքում էլ դեռ չի եղել։
35-ամյա Պանայոտովի հնարավոր մասնակցության մասին առաջինը հայտարարել էր պրոդյուսեր Իգոր Կրուտոյը փետրվարի սկզբին։ Նա ասել էր, որ Առաջին ալիքն արդեն որոշումը կայացրել է, ինքը 90 տոկոսով համոզված է դրանում։
Պանայոտովի պրոդյուսերությամբ զբաղվող երգիչ Գրիգորի Լեպսն էլ հայտարարել էր, որ երաժշտական մրցույթում Պանայոտովի մասնակցության վերաբերյալ հստակ տեղեկություն չկա։ Փետրվարի սկզբին Super կայքը հրապարակել էր «Եվրատեսիլի» հավակնորդների ցանկը, որոնց թվում էին նաև Little Big խումբն ու երգչուհի Պոլինա Գագարինան։
Երգիչը կկատարի այն երգը, որի ընտրությանը մասնակցել է նրա պրոդյուսերը` Գրիգորի Լեպսը։ Ստեղծագործություններն ուղարկել են տարբեր հեղինակներ, որից էլ ընտրել են լավագույնը։
«Եվրատեսիլ 2020»–ը կանցկացվի Ռոտերդամում։ Մրցույթի եզրափակիչ փուլը նախատեսված է մայիսի 16-ին։
Անճանաչելի դարձած Ադելը երգել է ընկերուհու հարսանիքին. տեսանյութեր
Ալեքսանդր Պանայոտովը ծնվել է Զապորոժիեում։ Ռուսաստանի երաժշտական Օլիմպոսում է հայտնվել «Ժողովրդական արտիստ» ռեալիթի շոուին մասնակցելուց հետո։ Նա «Եվրատեսիլի» ազգային նախընտրական փուլերին է մասնակցում 2005 թվականից։ Երեք ալբոմ է թողարկել։
Հիշեցնենք, որ Հայաստանը Ռոտերդամում կներկայացնի հունահայ երգչուհի Աթենա Մանուկյանը։
Աշոտյանի «Իմ լավ ընկեր» երգը վրացի երգիչն իր մայրենի լեզվով է ներկայացրել
