ԵՐԵՎԱՆ, 12 մարտի — Sputnik. ՀՀ կրթության, գիտության, մշակույթի և սպորտի նախարարությունը մտադիր է ասպիրանտների ու դոկտորանտների կրթաթոշակները զգալի բարձրացնել։ Որոշման նախագիծն արդեն մշակվել ու հանրային քննարկման է դրվել։
ԿԳՄՍՆ բարձրագույն և հետբուհական մասնագիտական կրթության վարչության պետի տեղակալ Լուսինե Գրիգորյանը Sputnik Արմենիայի հետ զրույցում հայտնեց, որ կրթաթոշակների բարձրացման համար նախարարության 2020–ի բյուջեում համապատասխան միջոցներ են նախատեսել։
«Կրթաթոշակները կավելանան 35 000 դրամով։ Սա միայն սկիզբն է լինելու, քանի որ մենք մտադիր ենք գիտության ոլորտում ֆինանսավորման նոր մեխանիզմներ ունենալ»,–ասաց Գրիգորյանը։
Նրա խոսքով` կառավարությունը դեռևս 2007–ին սահմանել էր ասպիրանտների ու դոկտորանտների կրթաթոշակների չափը։ Ըստ այդմ` պետական կրթաթոշակով առկա ուսուցմամբ հայագիտական ուղղվածությամբ մասնագիտություններով ասպիրանտներն ամսական ստանում են 30 000 դրամ, բնագիտական և այլ մասնագիտություններով սովորողները` 25 000 դրամ, տնտեսագիտական և իրավաբանական մասնագիտություններով սովորողները` 20 000 դրամ, իսկ դոկտորանտները` 30 000 դրամ։ Այժմ 35 000 դրամով կավելանան յուրաքանչյուր բաժնում սովորողների կրթաթոշակները։
Գրիգորյանի խոսքով` կրթաթոշակների բարձրացումը կառավարության ծրագրից է բխում, քանի որ այնտեղ նշվում է` պետք է քայլեր անել որակյալ կրթության ապահովման, երիտասարդ գիտնականների խրախուսման ուղղությամբ։
«Շատերն ասում են, թե գիտության համար տրամադրվող գումարը շատ քիչ է, սակայն վստահ ասում եմ` սա առաջին քայլն է։ Գիտության ոլորտում ֆինանսական աջակցության նոր մեխանիզմների շնորհիվ անհրաժեշտ միջավայր կստեղծի նրանց համար, ովքեր ուզում են գիտությամբ զբաղվել»,–ասաց նա։
Գրիգորյանը հավելեց` տարիներ անց գիտության ոլորտում ֆինանսավորման առումով ավելի բարվոք իրավիճակ կունենանք։
Մասնագետը հայտնեց` ասպիրանտների թիվն այս պահին շուրջ 700–ի է հասնում։
Հարցը կենսաթոշակը չէ. ինչու են ուզում արտոնություն տալ հայոց լեզվի վրաստանցի ուսուցիչներին
Նշենք, որ կրթաթոշակների բարձրացման որոշման նախագիծը, բացի հանրային քննարկման դնելուց, նաև ֆինանսների նախարարություն է ուղարկվել։ Դրանից հետո այն կուղարկվի կառավարություն։
ԳԱԱ ինստիտուտների միացումը բուհերին կունենա աղետալի հետևանքներ. Մելքոնյանը` օրինագծի մասին
