ԵՐԵՎԱՆ, 1 ապրիլի- Sputnik. ՀՀ արտաքին գործերի նախարարությունը Արցախում անցկացված նախագահական և խորհրդարանական ընտրությունների վերաբերյալ հայտարարություն է տարածել՝ շնորհավորելով Արցախի իշխանություններին և ժողովրդին ժողովրդավարական բարձր չափանիշներին համապատասխան ազատ և արդար ընտրությունների անցկացման առթիվ:
«Արցախի ապագա իշխանությունները, որոնք խորհրդարանական ընտրությունների արդյունքում արդեն ստացել են, իսկ նախագահական ընտրությունների երկրորդ փուլի արդյունքով ստանալու են Արցախի ժողովրդի մանդատը, առանձնահատուկ պատասխանատվություն և դերակատարում ունեն ղարաբաղյան խաղաղ գործընթացում»,- գրված է հայտարարության մեջ։
Նշվում է, որ ԵԱՀԿ Մինսկի խմբի համանախագահները նույնպես, անդրադառնալով Արցախի ընտրություններին, հակամարտության կարգավորմանն ուղղված սկզբունքների և տարրերի համատեքստում ևս մեկ անգամ ընդգծել են Արցախի բնակչության դերն իր ապագան որոշելու գործում։
Սուրենյանց. «Արայիկ Հարությունյանը երկրորդ փուլում մրցելու է Սամվել Բաբայանի ստվերի հետ»
Ըստ ՀՀ արտաքին քաղաքական գերատեսչության՝ Արցախի ընտրված իշխանությունների ակտիվ ներգրավումը որպես հակամարտություն կարգավորման հիմնական կողմ էականորեն կբարձրացնի բանակցային գործընթացի արդյունավետությունը և կապահովի առաջընթաց կարգավորման առանցքային հարցերում:
«Արցախի ընտրությունները կարևոր են նաև տարածաշրջանում ժողովրդավարության, մարդու իրավունքների և քաղաքացիական հասարակության ամրապնդման տեսակետից: Այն վերստին փաստում է իրողությունը, որ հակամարտությունը չի կարող դառնալ անհաղթահարելի խոչընդոտ ժողովրդավարական հասարակության կառուցման ճանապարհին»,- նշված է ԱԳՆ հայտարարության մեջ։
Հիշեցնենք՝ երեկ Արցախում անցկացվեցին նախագահական և խորհրդարանական ընտրություններ։ ԱՀ ԿԸՀ նախագահ Սրբուհի Արզումանյանն այսօր տեղեկացրեց, որ նախագահական ընտրությունների երկրորդ փուլ կանցկացվի, քանի որ թեկնածուներից ոչ ոք չի հաղթահարել 50+1 տոկոսի շեմը։ Ընտրությունների երկրորդ փուլին կմասնակցեն նախագահի թեկնածուներ Արայիկ Հարությունյանն ու Մասիս Մայիլյանը։
