ԵՐԵՎԱՆ, 2 ապրիլի – Sputnik. Ռուսաստանը կոչ է անում կողմերին զերծ մնալ ուժի կիրառումից։ ՌԴ ԱԳՆ պաշտոնական ներկայացուցիչ Մարիա Զախարովան այս մասին ասաց այսօր ավանդական ճեպազրույցի ժամանակ՝ մեկնաբանելով հայ-ադրբեջանական սահմանին տեղի ունեցած միջադեպը։
«Ստացած տեղեկության համաձայն՝ սահմանին հրադադարի ռեժիմի խախտումները շարունակվում են։ Գնդակոծության են ենթարկվում քաղաքացիական օբյեկտները, տրանսպորտային միջոցները, կան վիրավորներ, այդ թվում՝ խաղաղ բնակչության շրջանում։ Կոչ ենք անում կողմերին լինել զուսպ, զերծ մնալ ուժի կիրառումից։ Ու հենց օբյեկտիվ պայմաններ ստեղծվեն, նորից բանակցությունների սեղանի շուրջ նստել»,- նշեց Զախարովան։
Հիշեցնենք՝ Հայաստանի պաշտպանության նախարարությունը մարտի 30-ին հաղորդել էր, որ Ադրբեջանի զինված ուժերը դիվերսիոն ներթափանցման փորձ են արել, սակայն հայկական կողմի գործողությունների արդյունքում դիվերսանտները հետ են շպրտվել: Գործողության ընթացքում վիրավորվել են երկու հայ զինծառայողներ: Ադրբեջանական կողմը միաժամանակ կրակ է բացել Տավուշի մարզի Բաղանիս և Ոսկեվան համայնքների ուղղությամբ, ինչի հետևանքով վիրավորվել է այդ պահին պատշգամբում գտնվող 14-ամյա երեխան:
Ադրբեջանական կրակոցից դպրոցական է վիրավորվել. ՄԻՊ-ը դիմել է միջազգային կառույցներին
Մարտի 27-ին ադրբեջանական զինված ուժերը կրակ են բացել հայկական ԶՈՒ–ի ուղղությամբ, ինչի հետևանքով պայմանագրային զինծառայող է վիրավորվել:
