ԵՐԵՎԱՆ, 12 ապրիլի-Sputnik. Նոր տիպի կորոնավիրուսի ախտորոշման թեստավորում իրականացվում է նաև Վանաձորում։ Տեղեկությունը հայտնում է ՀՀ առողջապահության նախարար Արսեն Թորոսյանը, որը Facebook-ի իր պաշտոնական էջում հրապարակել է Հիվանդությունների վերահսկման և կանխարգելման կենտրոնի Վանաձորի մասնաճյուղի լուսանկարը։
Լուսանկարին կից նա նշել է, որ այնտեղ արդեն 2 օր է՝ իրականացվում են կորոնավիրուսի ախտորոշման ՊՇՌ հետազոտություններ։
«Մասնաճյուղն ունի կենսաանվտանգության պահանջվող մակարդակ և ապահովված է սարքավորումներով ու կադրային ներուժով։ Այն այս պահին սպասարկում է Լոռու և Շիրակի մարզերին»,- գրել է նախարարը։
Կորոնավիրուսի հետևանքով աշխարհում ավելի քան 110 000 մարդ է մահացել
Թորոսյանը նաև մանրամասնել է, որ երեկ հանրապետությունում կորոնավիրուսի ախտորոշման 680 թեստ է անցկացվել, ինչն այս պահին ռեկորդային թիվ է։
Հիշեցնենք, որ ապրիլի 12-ի առավոտվա տվյալներով՝ Հայաստանում կորոնավիրուսով վարակվածների թիվը 1013 է, բուժվածներն 197–ն են, փաստացի բուժվողները`803–ը։ Կորոնավիրուսից մահացել է 13 մարդ։
