ԵՐԵՎԱՆ, 14 ապրիլի - Sputnik. ՀՀ աշխատանքի և սոցիալական հարցերի նախարար Զարուհի Բաթոյանը կառավարության մամուլի կենտրոնում կայացած ասուլիսի ժամանակ հույս հայտնեց, որ Ucom ընկերության շուրջ ստեղծված իրավիճակով պայմանավորված կապի խնդիրներ չեն առաջանա։
«Տեղեկություններ ունեմ, որ տնօրենի հրաժարականի և աշխատակիցների ներկայացրած դիմումների դեպքում էլ` ընկերությունը շարունակում է աշխատել, որպեսզի կապն անխափան լինի։ Բացի այդ, կարծում եմ` ընկերությունը կկարողանա լուծել այդ խնդիրը, քանի որ բավականին կայացած ու ճկուն է, ունի ռեսուրսներ»,–ասաց նախարարը։
Նրա խոսքով` ընկերությունն ունի կոնկրետ խնդիր, որը փորձում են լուծել կոնկրետ քայլերով, ինչն այս ընթացքում կապի խափանման պատճառ չի դարձել։
Բաթոյանը հայտնեց` այս օրերին ստեղծված թեժ գիծը Ucom–ն է գործարկել, որի համար շնորհակալ է ընկերությանը։ Նա նշեց, որ թեժ գծի շնորհիվ` նախարարության 100–ից ավել աշխատողներ տնից կարողանում են աշխատել և պատասխանել քաղաքացիների զանգերին։
Նախարարությունում գործում է 2 թեժ գիծ`114, որը շուրջօրյա է, և նորաստեղծ` 011 300 114-ը, որը գործում է միայն աշխատանքային օրերին և աշխատանքային ժամերին։ Ի դեպ, վերջին 5 օրերի ընթացքում նորաստեղծ թեժ գծին արդեն 45 000 զանգ է ստացվել։
Նոր գլխավոր տնօրենը կապահովի գործի շարունակականությունը. Ucom-ը հայտարարություն է տարածել
Հիշեցնենք, որ վերջին օրերին լրատվամիջոցները գրեցին, որ Ucom-ի տնօրենների խորհրդում խնդիրներ են ծագել Ucom-ի ու Beeline-ի հնարավոր ձուլման պատճառով։ Ucom–ի գլխավոր տնօրեն Հայկ Եսայանը հաստատել էր, որ դիմում է ներկայացրել իր աշխատանքային պարտականությունների դադարեցման մասին: Նրա հետ մեկտեղ աշխատանքից ազատման դիմումներ էին ներկայացրել ընկերության մոտ 800 աշխատակից։
Հայկ և Ալեքսանդր Եսայանները պատրաստ են գնել Ucom-ի` իրենց չպատկանող բաժնեմասը
Հայկ և Ալեքսանդր Եսայանները, որոնք ընկերության հիմնադիրներն են և ընկերության 5,94% բաժնետերերը, հայտարարություն են տարածել` նշելով, որ իրենք մնացած բաժնետոմսերը ձեռք բերելու առաջարկ են արել մյուս սեփականատերերին: 94,06% բաժնետոմսերի համար առաջարկվել է վճարել 22 մլրդ 100 մլն դրամ:
