ԵՐԵՎԱՆ, 23 ապրիլի – Sputnik. Երևանի քաղաքապետի տեղակալ Տիգրան Վիրաբյանը և ԿԳՄՍ նախարարի տեղակալ Արա Խզմալյանը կառավարությունում տեղի ունեցած մամուլի ասուլիսում ներկայացրին, թե վաղը՝ ապրիլի 24-ին, Հայոց ցեղասպանության 105–րդ տարելիցին նվիրված ինչ միջոցառումներ են տեղի ունենալու։
«Այս պահին Ծիծեռնակաբերդում լայնածավալ ադմինիստրատիվ և տեխնիկական աշխատանքներ են իրականացվում։ Առաջին անգամ է, որ Ծիծեռնակաբերդում 11 ժամ տևողությամբ համերգային ծրագիր ենք ունենալու։ Կարծում եմ, սա ևս հիշարժան տարելից կդառնա և կառանձնանա իր տեսակով՝ որպես մի նոր ձևաչափ»,-ասաց Խզմալյանը։
Նրա խոսքով` վաղը Ծիծեռնակաբերդում նախատեսվում է մոտ 60 ելույթ, որը կապահովեն շուրջ 160 մասնակիցներ։
«Նշեմ, որ խստորեն պահպանելու ենք անվտանգ հաղորդակցության բոլոր նորմերը։ Մասնակիցները միաժամանակ չեն լինելու Ծիծեռնակաբերդում, այլ փոխարինելու են իրար, առավելագույնը 5 անձ կլինեն՝ բացօթյա միջավայրում»,-ասաց նա։
Խզմալյանի խոսքով ելույթ կունենան սիմֆոնիկ, ֆիլհարմոնիկ նվագախմբերը, Կամերային երաժշտության ազգային կենտրոնը` իր երգչախմբերով և նվագախմբերով, լարային քառյակներ, ճանաչված օպերային երգիչներ և այլք։
Ամբողջ ծրագիրը լինելու է բազմաժանր ՝սկսած ժողովրդական երգ-երաժշտությունից մինչև միջնադարյան երաժշտության ջազային մշակում։
Երևանի քաղաքապետի տեղակալ Տիգրան Վիրաբյանն էլ, անդրադառնալով Ծիծեռնակաբերդում մեր հայրենակիցների խորհրդանշական ներկայությունն ապահովող sms հաղորդագրություններին, մանրամասնեց, որ դրանք կլինեն սիմվոլիկ 1 դրամ արժողությամբ։
Ցեղասպանության կարգախոսը կփոխվի՞. կառավարությունում այս թեմայով քննարկում է եղել
«Սկսած առավոտյան 8-ից Հայաստանում և Արցախում բնակվող մեր հայրենակիցները կարող են 1915 կարճ համարի ուղարկել sms հաղորդագրություն և երեկոյան Ծիծեռնակաբերդի սյուներին լուսապատկերի միջոցով տեսնել իրենց անուն-ազգանունը` ապահովելով իրենց խորհրդանշական մասնակցությունը։ Իսկ սփյուռքի մեր հայրենակիցները կարող են իրենց անուն- ազգանունները ուղարկել 0037433191500 հեռախոսահամարին։ Մեր օպերատորները համաձայն են այս ակցիային անվճար մասնակցել, բայց որոշակի օրենսդրական գործողությունների արդյունքում է, որ չի թույլատրվում անել բացառապես անվճար, այդ պատճառով մեկ հաղորդագրության արժեքը կլինի 1 դրամ»,-ասաց Վիրաբյանը։
Նրա խոսքով` յուրաքանչյուր հեռախոսահամարից կարող են ուղարկել առավելագույնը 5 անուն-ազգանուն, ցանկալի է դրանք լինեն հայատառ։
«Սա լավագույն լուծումն էր, որ մենք կարող ենք առաջարկել մեր հայրենակիցներին ստեղծված պայմաններում։ Վստահ եմ, որ երեկոյան Ծիծեռնակաբերդի սյուներին կգրվեն հարյուր հազարավոր անուն-ազգանուններ»,-ասաց նա։
Հիշեցնենք` Հայոց ցեղասպանության զոհերի հուշահամալիրի մուտքն այս տարվա ապրիլի 24-ին փակ կլինի։
Ավելի վաղ վարչապետի աշխատակազմի ղեկավար Էդուարդ Աղաջանյանը հայտնել էր, որ միջոցառումները կմեկնարկեն ապրիլի 23-ին։ Երեկոյան 21։00-ին կհնչեն եկեղեցական զանգերի ղողանջներ, որոնց ներքո կմարեն Երևանի և մարզկենտրոնների փողոցների լույսերը։ Կառավարությունը կոչ է անում 21։00-ից սկսած մարել բնակարանների լույսերը և բջջային հեռախոսների լույսերի վառումով պատուհաններից խորհրդանշել միասնական ներկայությունն անմար կրակի շուրջ։
Մարեք լույսերը, միացրեք հեռախոսները. ապրիլի 24-ին Եղեռնի զոհերի հուշահամալիրը փակ կլինի
Ապրիլի 24-ին, ժամը 10–ին կմեկնարկեն վարչապետի, նախագահի, կաթողիկոսի այցերը հուշահամալիր։
