10:51 02 հուլիսի 2020
Ուղիղ եթեր
  • USD482.52
  • GBP598.08
  • EUR540.76
  • RUB6.79
Հասարակություն
Ստանալ կարճ հղումը
Ապրիլի 24. Հայոց ցեղասպանության չմոռացվող էջը (85)
152 0 0

ՀՀ վարչապետը համոզված է, որ այս տարվա միջոցառումներով մենք կարողացանք քաղաքակրթության նոր նշաձող սահմանել։

ԵՐԵՎԱՆ, 27 ապրիլի – Sputnik. ՀՀ վարչապետ Նիկոլ Փաշինյանը գոհ է Հայոց ցեղասպանության զոհերի հիշատակին նվիրված միջոցառումներից։ Նա Facebook–ի իր էջի ուղիղ եթերում նշեց, որ իշխանությունը կարողացավ իրագործել «ճգնաժամը` որպես հնարավորություն» թեզը:

«Այս տեսական թեզն ամենավառ արտահայտումը գտավ ապրիլի 24–ին, որովհետև մենք բոլորս կանգնած էինք մի շատ ծանր իրավիճակի առաջ, երբ մոտենում էր Հայոց ցեղասպանության 105-րդ տարելիցը, և միաժամանակ թևածում էր համաճարակը։ Մենք ծանր իրավիճակում էինք` մտածելով, թե ինչպես կարելի է ՀՀ քաղաքացիներին և ընդհանրապես մարդկանց արգելել բարձրանալ Ծիծեռնակաբերդ, դա աներևակայելի մի բան էր թվում, մյուս կողմից` ինչպե՞ս կարելի էր թույլ տալ` իմանալով, որ դրա հետևանքով ոչ թե օրական կորոնավիրուսի մի քանի տասնյակ, այլ մի քանի հարյուր դեպք ենք ունենալու, և ընդհանրապես իրավիճակը վստահաբար դուրս է գալու հսկողությունից: Հենց այստեղ էր, որ մենք որոշեցինք առաջնորդվել «ճգնաժամը` որպես հնարավորություն» օգտագործելու թեզով: Մենք խնդիր դրեցինք, որ եթե այսպես է, ուրեմն պետք է ինչ-որ ձևով, մեր միտքը օգտագործելով այնպես կազմակերպել այդ օրվա միջոցառումները, որ նույնիսկ ավելի տեսանելի և ավելի հզոր լինեն մեր ազգային ուղերձների ընդգծման և փոխանցման առումով»,– ասաց Փաշինյանը:

Վարչապետը նշեց, որ երբ այդ գաղափարները քննարկում էին, չգիտեին` կստացվե՞ն, թե՞ ոչ, կկարողանա՞ն պարզերես լինել հանրության, ժողովրդի, սփյուռքի առաջ, թե՞ ոչ:

«Բայց մենք առաջնորդվեցինք «ճգնաժամը` որպես հնարավորություն» թեզով: Ի՞նչ տեղի ունեցավ։ Մենք մեր մասին, մեր պատմությունը պատմեցինք առանց աղաղակի, շատ ուժեղ, լսելի, տեսանելի ոգեկոչեցինք, բայց առանց ողբի: Ինքներս մեզ նայեցինք այլ տեսակետից, և մեր այդ կերպարը, համոզված եմ, բոլորիս շատ դուր եկավ, որովհետև մենք հասկացանք, որ ահա այսպիսի ազգ ենք, այսպիսի ժողովուրդ ենք: Շատերը սոցցանցերում հարց էին բարձրացնում, թե ինչպե՞ս կարելի է ապրիլի 24-ին Ծիծեռնակաբերդ բարձրանալ արևածաղիկ չրթելով, շատերը բարձրացնում էին հարցը, որ փողոցների երկայնքով, գետնին թափված ծաղկի վաճառք է տեղի ունենում և այլն»,– նշեց Փաշինյանը:

Վարչապետի խոսքով` մենք նայեցինք մեր մյուս կերպարին, այդ երկուսը համեմատեցինք և հարցեր բարձրացրինք:

«Մենք կարողացանք ոչ միայն սևերես չլինել, այլև կարողացանք քաղաքակրթության նոր նշաձող սահմանել»,– շեշտեց Փաշինյանը։

Վարչապետն ավելացրեց, այս տարվա ապրիլի 24-ի միջոցառումները 100 տոկոսով անթերի չէին, բայց սա մեր ազգային ընկալումն էր։ Նա նշեց նաև, որ հաջորդ տարիներին, երբ Ծիծեռնակաբերդի ավանդական երթը կրկին տեղի ունենա, այս տարվա փորձն անպայման կօգտագործվի, որպեսզի միջոցառումներն ավելի տպավորիչ լինեն։

Հիշեցնենք` կորոնավիրուսի տարածումը կանխելու համար Հայաստանում և Արցախում այս տարի ապրիլի 24–ի զանգվածային միջոցառումները չեղարկվեցին։ Արգելվեց մարդկանց ամենամյա երթը դեպի Ծիծեռնակաբերդ։ Փոխարենը «Ոգեկոչման գիշեր» խորագրով համերգ անցկացվեց, որի ընթացքում հուշակոթողի սյուների վրա մեկ առ մեկ հայտնվեցին այն մարդկանց անունները, որոնք, չկարողանալով այցելել Ծիծեռնակաբերդ, հաղորդագրություն էին ուղարկում 1915 կարճ համարին` ապահովելով իրենց խորհրդանշական մասնակցությունը։

թեմա:
Ապրիլի 24. Հայոց ցեղասպանության չմոռացվող էջը (85)

Ըստ թեմայի

Սերժ Սարգսյանն այցելել է Ծիծեռնակաբերդ և ծաղիկներ խոնարհել անմեղ զոհերի հիշատակին
ԱՄՆ նախագահ Թրամփը կրկին չի օգտագործել «Հայոց ցեղասպանություն» արտահայտությունը
«Երբեք չպետք է մոռանանք Հայոց ցեղասպանության զոհերի մասին». Թրյուդոյի գրառումը
Քիմ Քարդաշյանը բոլորին խնդրում է դիտել «Ցեղասպանության թոռները» տեսահոլովակը
Սարգսյանը Հայոց ցեղասպանության դրդապատճառներն է ներկայացրել Nouvelles d’Arménie ամսագրին
թեգերը:
Հայոց ցեղասպանություն, Ծիծեռնակաբերդ, Նիկոլ Փաշինյան, Հայաստան

Գլխավոր թեմաներ