ԵՐԵՎԱՆ, 2 մայիսի – Sputnik. «Լուսավոր Հայաստան» խմբակցության ղեկավար Էդմոն Մարուքյանը կառավարությանը կոչ է անում ֆինանսական աջակցություն տրամադրել սոցիալապես անապահով ընտանիքներին։
«Պատկերացնում եմ, որ ում կարողանում են, գրում, զանգում ու դիմում են մարդիկ: Ինչպես կարող եմ, օգնում եմ, բայց արդեն խելագարվել կարելի է, այս ամենը գնալով խորանում է: Կառավարություն ջան, ուղղակի ֆինանսական աջակցություն ցուցաբերեք` առանց դեզի մեջ ասեղ փնտրելու։ Հերիք է ձգեք, մարդկանց սովի եք մատնել, մարդ եղեք էլի...»,–Facebook–ի իր էջում գրել է Մարուքյանը։
Նա նաև մի նամակ է հրապարակել, որը ստացել չորս երեխաների ծնողից։
«Բարև ձեզ, կներեք ձեզ անհանգստացնելու համար, բայց հանուն երեխաներիս խնդրում եմ։ Շատ վատ վիճակում ենք, մի փոքրիկ գումարով օգնեք մեզ` երեխաներս քաղցած չմնան, թեկուզ 5000 դրամով, համարեք ձեր հարազատ երեխաներին եք օգնում։ Ձեր ուղարկած գումարով կարող են մի քանի օր չորս երեխա քաղցած չքնել ... Եթե հարցը երեխաներիս չվերաբերեր, երբեք չէի խնդրի»,– գրված է նամակում։
Հիշեցնենք` կորոնավիրուսի տարածումը կանխելու համար Հայաստանում մարտի 16-ից ապրիլի 14–ն արտակարգ դրություն էր սահմանվել, որը ՀՀ փոխվարչապետ, պարետ Տիգրան Ավինյանն առաջարկեց երկարաձգել 30 օրով։
Կառավարությունն ապրիլի 13–ին ընդունեց համապատասխան որոշումը, որի համաձայն` արտակարգ դրության ռեժիմը Հայաստանում կգործի մինչև 2020 թվականի մայիսի 14-ը՝ ժամը 17:00-ը ներառյալ։ Երեկ` մայիսի 1-ին հայտարարվեց, որ մայիսի 4-ից կվերացվեն քաղաքացիների տեղաշարժին ու տնտեսական գործունեությանը վերաբերող մի շարք սահմանափակումներ, տեղաշարժման թերթիկի անհրաժեշտություն էլ չի լինի։
Չնայած կառավարությունը կորոնավիրուսի հետևանքները չեզոքացնելու նպատակով 15 միջոցառում է նախաձեռնել, բայց տներում փակված մարդկանցից շատերը հայտնվել են անելանելի վիճակում։
Հենրիխ Մխիթարյանը, Արթուր Աբրահամն ու Վիկ Դարչինյանը միացել են կորոնավիրուսի դեմ պայքարին
