ԵՐԵՎԱՆ, 18 մայիսի – Sputnik. Երևանի քաղաքապետի առաջին տեղակալ Հրաչյա Սարգսյանն այսօր հրավիրված ասուլիսի ժամանակ հայտնեց, որ քաղաքապետարանն իրականացրել է այսօրվանից աշխատանքը վերսկսող երևանյան տրանսպորտի ախտահանումը, ընդ որում` թե՛ համայնքին պատկանող, թե մասնավոր ավտոմեքենաների։
«Իսկ ինչ վերաբերում է բժշկական դիմակներին ու ձեռնոցներին, դրանք վարորդների համար ձեռք են բերելու գիծը շահագործող ընկերությունները»,- ասաց նա:
Անվտանգության միջոցառումների հսկողություն իրականացնելու համար պետական ու համայնքային մարմինները բավարար մարդկային ռեսուրս չունեն, ուստի քաղաքացիներին հորդորում են ուշադիր լինեն միմյանց անվտանգության կանոնները պահպանելու նկատմամբ:
«Եթե ինչ-որ բան այնպես չի անում, կամ ինչ–որ մեկը դիմակը ճիշտ չի կրում, ապա կարող են հորդորել կամ ասել: Կարծում եմ` միմյանց վերահսկողությունը կարող է մեծ ազդեցություն ունենալ, և կկարողանանք դուրս գալ այս իրավիճակից»,- ասաց նա:
Ինչ վերաբերում է վարորդների, այսպես կոչված, օրվա պլանին, փոխքաղաքապետը հայտնեց, որ այդ հարցի կարգավորումը թողնված է գծի տերերի՝ շահագործող կազմակերպությունների վրա:
«Ես կարծում եմ, որ այսօր կաշխատենք, օրվա վերջում կամփոփենք, ու արդեն պարզ կդառնա, թե ինչ ճանապարհով պետք է առաջ շարժվենք»,- ասաց նա:
Սարգսյանը, սակայն, չհերքեց՝ քաղաքապետարանում էլ են տեղյակ, որ ուղևորահոսքը քիչ է լինելու, շահութաբերությունը՝ գրեթե զրոյական:
Հիշեցնենք, որ ՀՀ կառավարությունը մայիսի 14–ի նիստում Հայաստանում արտակարգ դրությունը երկարացրեց ևս մեկ ամսով։ Այն կտևի մինչև հունիսի 13–ը` ժամը 17։00–ը ներառյալ։
Կառավարության որոշմամբ այսօրվանից գործելու է հանրային տրանսպորտը, բայց հատուկ սահմանված կանոններով. վարորդներն ու ուղևորները պետք է անպայման դիմակներով ու ձեռնոցներով լինեն, մինչև 9 մետր երկարություն ունեցող տրանսպորտային միջոցներում կարգելվի կանգնած ուղևորների փոխադրումը, արգելվում է նաև վարորդի հարևան նստարանին նստելը:
Որ երեխաները կկարողանան մանկապարտեզ հաճախել. փոխքաղաքապետը մանրամասներ ներկայացրեց
