ԵՐԵՎԱՆ, 19 մայիսի - Sputnik. «Զատիկ երեխաների աջակցման կենտրոնում» դանակահարություն է տեղի ունեցել։ Փաստի առթիվ հարուցվել է քրեական գործ։ Տեղեկությունը հայտնում է ՀՀ քննչական կոմիտեի մամուլի ծառայությունը։
«Նախաքննությամբ պարզվել է, որ նշված ՊՈԱԿ-ի նախկին սանը 2020թ. մայիսի 1-ին՝ ժամը 18:00-ի սահմաններում, գտնվելով «Զատիկ երեխաների աջակցման կենտրոն» պետական ոչ առևտրային կազմակերպության երկրորդ հարկի միջանցքում, ցանկացել է զրուցել նշված կազմակերպության սաներից մեկի հետ, սակայն վերջինիս կողմից իր հետ զրուցելուց խուսափելու և իրեն սուտ տեղեկություններ փոխանցելու համար նախկին սանը միջանցքում նախ դիտողություն է կատարել տղային, ապա մարմնական վնասվածք պատճառելու առերևույթ դիտավորությամբ իր մոտ գտնվող ծալովի դանակով մի քանի անգամ հարվածել է վերջինիս մարմնի տարբեր մասերին՝ պատճառելով կյանքին վտանգ սպառնացող առողջության ծանր վնաս»,- նշված է հաղորդագրության մեջ:
Դանակահարություն Երևանում. 19 և 25–ամյա տղաներին հիվանդանոց են տեղափոխել
Ձեռք բերված բավարար ապացույցների համակցությամբ ՊՈԱԿ-ի նախկին սանին մեղադրանք է առաջադրվել ՀՀ քրեական օրենսգրքի 112-րդ (դիտավորությամբ առողջությանը ծանր վնաս պատճառելը) հոդվածի 2-րդ մասի 9-րդ կետով նախատեսված արարքը առերևույթ կատարելու համար: Դատարանը բավարարել է նրա նկատմամբ խափանման միջոց կալանավորումը կիրառելու վերաբերյալ միջնորդությունը։
Նախաքննությունը շարունակվում է:
Լոռիում օղի խմելու հրավերը մերժելը վերածվել է վեճի, հետո դանակահարության․ ՔԿ
