ԵՐԵՎԱՆ, 20 մայիսի – Sputnik. Բանակում ախտահանման աշխատանքների իրականացման համար միջոցների ու տեխնիկայի պակաս չկա: ԱԺ-ում լրագրողներին այս մասին վստահեցրեց ՀՀ պաշտպանության փոխնախարար Գաբրիել Բալայանը:
Փոխնախարարն ասաց, որ զորակոչի ընթացքում կորոնավիրուսի տարածման մտավախությունները նույնպես այս պահին որևէ հիմնավորում չունեն:
«Այս պահի դրությամբ դեռ դեպքեր չենք արձագրել, որը հիմք կտար անգամ ծառայողական քննություն նշանակել, ու կարգապահական տույժ տալ այդ իրավախախտումը կատարելու համար»,- ասաց նա:
Բալայանը նաև հիշեցրեց, որ բանակում ծնողների հետ տեսակցությունների արգելքը պահպանվում է, ինչին, նրա խոսքով, զինվորների ծնողներն ըմբռնումով են մոտենում:
«Մենք այդ մասով բողոքներ չունենք ու կարծում եմ՝ յուրաքանչյուր ծնող պետք է գիտակցի, որ տեսակցությունները սահմանափակելն առաջին հերթին բխում է զինծառայողի շահերից»,- ասաց նա:
Բալայանը վստահեցրեց նաև, որ բանակն ապահովված է դիմակներով ու պաշտպանիչ բոլոր անհրաժեշտ միջոցներով:
Հիշեցնենք` Հայաստանում կորոնավիրուսով վարակվածների թիվը հասել 5271–ի։
Այս պահին փաստացի բուժում է ստանում 2758 մարդ, կատարվել է 44071 թեստավորում, առողջացել են վարակվածներից 2419–ը։ Ընդհանուր առմամբ գրանցվել է կորոնավիրուսային հիվանդությունից մահանալու 67 դեպք (երեկվա համեմատ ավելացել է 3-ով) և մահվան 27 անուղղակի դեպք:
