ԵՐԵՎԱՆ, 1 հունիսի – Sputnik. Ճիշտ է, բացօթյա տարածքում, բայց ՀՀ վարչապետ Նիկոլ Փաշինյանը պարետատան նիստից հետո ճեպազրույցով հանդես եկավ։ Նրա կողքին, սոցիալական հեռավորությունը պահպանելով, կանգնած էին ՀՀ առողջապահության նախարար Արսեն Թորոսյանն ու փոխվարչապետ, պարետ Տիգրան Ավինյանը։
«Ես և իմ ընտանիքի անդամները վարչապետի կեցավայրում ենք մեկուսացած։ Քիչ առաջ ջերմությունս չափեցի` 36.5 էր։ Որևէ մեկս չունենք աշխտանշաններ։ Ես շարունակում եմ աշխատել, և քիչ առաջ պարետատան նիստն ավարտեցինք, որն անցկացնում էինք հեռավար ձևով»,–ասաց Փաշինյանը` հավելելով, որ վաղվանից աշխատանքային բնականոն ռեժիմին կվերադառնա։
Նա նշեց, որ ամենայն հավանականությամբ հենց ինքն է վարակվել կորոնավիրուսով ու վարակել իր ընտանիքի անդամներին։ Փաշինյանը նշեց, թե հակահամաճարակային կանոնների հետ կապված սխալ է թույլ տվել։ Նա կոչ արեց իր պատմությունը չկրկնել։
Նրա խոսքով` այսօր Հայաստանում առանց ախտանշանների մոտ 18-20 000 հիվանդ կարող է լինել։
Հիշեցնենք` Փաշինյանն այսօր առավոտյան Facebook–ի ուղիղ եթերում հայտնեց, որ վարակվել է կորոնավիրուսով։
Հայաստանում կորոնավիրուսով վարակվածների թիվը մեկ օրում ավելացել է 210-ով և հասել 9492–ի
