ԵՐԵՎԱՆ, 11 հունիսի – Sputnik. ՀՀ առողջապահության նախարար Արսեն Թորոսյանի խորհրդական Աշոտ Սարգսյանը Facebook-ում պարզաբանել է մեկուսացման ուղեգրում տեղ գտած սխալը, որն աղմուկ է առաջացրել համացանցում։
«Սասնա ծռեր» համահայկական շարժումն այսօր հրապարակել է մեկուսացման ուղեգրի լուսանկար, որը, ըստ կից գրառման, տրվել է Ռուսաստանից ժամանած արցախաբնակ ՀՀ քաղաքացուն Նորքի ինֆեկցիոն հիվանդանոցում։ Ուղեգրի մեկուսացման հասցեի տողում գրված է. «Ադրբեջան, Շուշի քաղաք»։
«Համակարգը ավտոմատացված է գտնում վայրը քարտեզի վրա․ եթե փորձի համար Facebook-ում նշեք Արցախի որևիցե քաղաք, ցավոք, բերելու է, որ դրանք Ադրբեջանում են: Դա քարտեզների խնդիրն է, Google-ը պիտի ուղղի դա, սակայն նրանք չեն անում»,- լուսանկարի մեկնաբանությունների դաշտում պարզաբանել է Աշոտ Սարգսյանը։
Նշենք, որ մեկուսացման ուղեգրում նշված է բժշկուհի Ալիտա Նիկողոսյանի անունը, սակայն փաստաթղթում բացակայում է թե՛ նրա ստորագրությունը, թե՛ բուժկենտրոնի կնիքը։ Դա տեղիք է տվել համացանցում քննարկումների, որ մեկուսացման ուղեգիրը կեղծ է և պատրաստվել է սադրիչ նպատակներով։
Առողջապահության նախարարի խոսնակ Ալինա Նիկողոսյանն էլ Facebook–ում գրել է. «Նորք» ինֆեկցիոն կլինիկական հիվանդանոցի կողմից Ռուսաստանից ժամանած արցախաբնակ քաղաքացուն Շուշիի հիվանդանոց ուղեգրելու փաստաթղթի առնչությամբ հարկ ենք համարում նշել, որ տեղի է ունեցել տեխնիկական վրիպակ: Խնդրում եմ զերծ մնալ հարցի անհարկի շահարկումներից»:
Հայաստանում այս պահին կորոնավիրուսով վարակվածների թիվը հասել է 14669–ի: Բուժում է ստանում 8876 մարդ, կատարվել է 75389 թեստավորում, առողջացել են վարակվածներից 5466-ը։ Ընդհանուր առմամբ գրանցվել է մահվան 245 դեպք։
Կորոնավիրուսով հիվանդներից 32-ը դուրս են մնացել մասնագիտացված հիվանդանոցներից. նախարար
