ԵՐԵՎԱՆ, 11 հունիս - Sputnik. Նախնական տեղեկություններով` Վերաքննիչ քրեական դատարանը ՀՀ պաշտոնաթող նախագահ Սերժ Սարգսյանի փեսա, Վատիկանում նախկին դեսպան Միքայել Մինասյանի կալանքի որոշումը ոչ թե բեկանել է, այլ ուղարկել է Առաջին ատյանի դատարան՝ նոր քննության։ Factor.am–ի հետ զրույցում նման կարծիք հայտնեց ՊԵԿ նորանշանակ նախագահ Էդվարդ Հովհաննիսյանը։
«Նախնական տեղեկություններով` Վերաննքիչը կալանքի վերաբերյալ Մինասյանի պաշտպանների միջնորդության քննության հարցը վերադարձրել է Առաջին ատյանի դատարան։ Վարույթն իրականացնող մարմինը դեռ չի ստացել Վերաքննիչ դատարանի կողմից կայացրած որոշման օրինակը, ուստի մեր հետագա գործողություններին անդրադառնալը վաղ է»,– ասաց Հովհաննիսյանը։
Անդրադառնալով Մինասյանի պնդումներին, թե ՊԵԿ–ը ներգրավված է մաքսանենգ ճանապարհով ծխախոտի արտահանման հարցում` Հովհաննիսյանը հայտնեց, որ բացի Մինասյանի պնդումներից, որևէ այլ փաստարկ չկա այդ առնչությամբ։ Նրա խոսքով` ՊԵԿ–ը միջազգային իր գործընկերներից կամ այլ երկրներից որևէ պաշտոնական գրություն չի ստացել արտահանված ծխախոտների` մաքսանենգ լինելու վերաբերյալ։
Միքայել Մինասյանի մեղադրանքն ավելացվել է նոր բացահայտումներով. «Սպայկան» և Ռոզա Ստեփանյանը
Հովհաննիսյանը հերյուրանք որակեց Փաշինյաների ընտանիքի մասնակցությամբ մաքսանենգ ճանապարհով ծխախոտի արտահանումը։
Հիշեցնենք, որ ՊԵԿ–ն Առաջին ատյանի դատարանին միջնորդություն էր ներկայացրել Միքայլել Մինասյանին կալանավորելու, որը բավարարվել էր։ Դրանից հետո Մինասյանի պաշտպանները դիմել էին Վերաքննիչ, ապա Մինասյանի պաշտպան Միհրան Պողոսյանը հայտարարություն էր տարածել, որ Վերաքննիչը բավարարել է իրենց միջնորդությունը։
Միքայել Մինասյանի համակարգչի վերականգնված ֆայլերը կուսումնասիրվեն. մեղադրանքը հիմք է
Միքայել Մինասյանը որպես մեղադրյալ է ներգրավվել Պետական եկամուտների կոմիտեի քննչական վարչությունում քննվող քրգործի շրջանակում միանգամից 3 հոդվածով:
Պետեկամուտների կոմիտեն ավելի վաղ տեղեկացրել էր, որ Մինասյանը մեղադրվում է ապօրինի հարստացման, հայտարարագրում կեղծ տվյալներ ներկայացնելու և հանցավոր ճանապարհով ստացված գույքն օրինականացնելու մեջ։
Քրեական գործն, ըստ ՊԵԿ-ի, հարուցվել է դեռևս մարտ ամսին, նախաքննության ընթացքում ձեռք բերված ապացույցների հիման վրա որոշում է կայացվել Մինասյանին ներգրավել որպես մեղադրյալ, նրա նկատմամբ հայտարարվել է հետախուզում։
Նախաքննական մարմինը նաև միջնորդություն էր ներկայացրել դատարան՝ նախկին դեսպանին կալանավորելու վերաբերյալ։
Երևանի ընդհանուր իրավասության դատարանը ՀՀ երրորդ նախագահի փեսա Միքայել Մինասյանին կալանավորելու որոշում էր կայացրել մայիսի 6-ին։
Ինչպե՞ս և ի՞նչ պայմաններով է Հայաստանը «Օսա ԱԿ-Մ» ձեռք բերել. ուշագրավ մանրամասներ
