ԵՐԵՎԱՆ, 21 հունիսի - Sputnik. Facebook սոցիալական ցանցում խիստ ակտիվացել են անձնական պրոֆիլը գողանալու կամ, այսպես կոչված, «ֆիշինգի» փորձերը։ Այս մասին Facebook-ի իր էջում նախազգուշացնում է սոցմեդիայի մասնագետ Տիգրան Մատինյանը՝ նշելով, որ այսօր վաղ առավոտից արդեն մի քանի նման դեպքերի է հանդիպել։ Փորձագետը բացատրում է, թե ինչպես է աշխատում «գողության» այս մեխանիզմը։
Ոչ մի բացառություն ԶԼՄ-ների ու քաղաքական գործիչների համար․ Facebook-ը փոխում է կանոնները
- Ստեղծվում է Facebook-ի Login լինելու էջին շատ նման, կեղծ կայք-էջ։
- Facebook-ում ստեղծվում է էջ՝ «Safety», «Security» և այլ մոլորեցնող անվանումներով։
- Իրենց էջում կատարում են գրառումներ՝ տեքստում tag անելով տարբեր բիզնես էջեր, մոտավորապես՝ այսպիսի բովանդակությամբ․ «Ձեր XXXX էջը բողոքարկվել է ուրիշ օգտվողի կողմից։ Եթե դուք սեփականատերն եք այս էջի, շտապ անցեք հղումով և հաստատեք։
- Հղումով անցնելիս բացվում է 1-ին կետում նշված կայք-էջը (նկարը կցված է գրառմանը):
- Ձեզ թվում է, թե Facebook-ում եք, և կամավոր հանձնում եք ձեր մուտքանունն ու գաղտնաբառը։
Մասնագետը հավելում է, որ այսօրվա ակտիվ արշավի կիսագրագետ տեքստերը թույլ են տալիս ենթադրել, թե դա Հայաստանից կազմակերպված չէ։
Նա խորհուրդ է տալիս, թե ինչ անել «գողության զոհ» չդառնալու համար։
Առաջին հերթին պետք չէ հավատալ նման գրառումներին, քանի որ, հիշեք, Facebook-ը երբեք նման ծանուցումներ չի ուղարկում։ Բացի այդ, մի սեղմեք կասկածելի հղումների վրա։ Տիգրան Մատինյանը հիշեցնում է՝ պետք չէ լրացնել մուտքանունն ու գաղտնաբառը՝ առանց կայքի URL-ը (կայքի վերևի տողում նշված հասցեն) ստուգելու և համոզվելու, որ հենց այն կայքում եք, որը փնտրում էիք։ Բայց եթե, այնուամենայնիվ, դա արել եք, ամեն ինչ դեռ կորած չէ։
Արագ փոխեք գաղտնաբառը։ Ընդ որում, եթե նույն գաղտնաբառը տարբեր տեղեր եք օգտագործում, ապա փոխեք բոլորը։
Մատինյանի վերջին խորհուրդն է՝ակտիվացնել կրկնակի անվտանգությունն անձնական պրոֆիլում, որպեսզի, անգամ գաղտնաբառն իմանալու դեպքում, «չարագործները» չկարողանան մուտք գործել ձեր էջ՝ առանց ձեր հեռախոսահամարին հասանելիություն ունենալու։
