ԵՐԵՎԱՆ, 30 հուլիսի - Sputnik. ՀՀ քաղաքացիներն արձագանքում են 2017 թվականի համապետական ընտրություններում հնարավոր ընտական հանցագործությունների բացահայտման հարցում օժանդակելու իրավապահ մարմինների կոչերին։ ՀՀ Գլխավոր դատախազությունը պաշտոնական հաղորդագրություն է տարածել, ըստ որի Կոտայքի մարզի բնակիչներից մեկը սեփական փորձառության մասին է պատմել։
Քաղաքացին մարզային վարչություն հաղորդում է ներկայացրել այն մասին, որ 2017թ․ապրիլի 2-ին՝ Կոտայքի մարզի Մրգաշեն գյուղի թիվ 28/16 ընտրատեղամասում կայացած ԱԺ խորհրդարանական ընտրությունների ժամանակ, ժամը 12:30-ի սահմաններում, գյուղի դպրոցի կողային հատվածում կանգնած՝ գործով դեռևս չպարզված սև գույնի «Լանդ Քրաուզեր» մակնիշի ավտոմեքենայից ինչ-որ անձ իրեն առաջարկել է «Բարգավաճ Հայաստան» կուսակցության օգտին քվեարկելու համար յուրաքանչյուր անձի քվեի դիմաց 5000 ՀՀ դրամ գումար։ Քաղաքացին ընդունել է առաջարկը և այդ անձից վերցրել է ընդհանուր 15.000 դրամ՝ իր, մոր և իր կնոջ կողմից ԲՀԿ օգտին քվեարկելու համար։ Գումարը վերցնելուց հետո նրանք կատարել են քվեարկություն:
«Նկատի ունենալով, որ նախապատրաստված նյութերում առերևույթ առկա է ընտրություններին մասնակցող թեկնածուներից, կուսակցություններից (կուսակցությունների դաշինքներից) որևէ մեկի օգտին կողմ քվեարկելու կամ ընտրություններին մասնակցելու պայմանով թեկնածուներից, կուսակցություններից անձամբ կամ միջնորդի միջոցով իր կամ այլ անձի համար կաշառք ստանալու, ինչպես նաև ընտրակաշառք տալու հանցագործության հատկանիշներ պարունակող տվյալներ և դեպքի հանգամանքներն անհրաժեշտ է պարզել՝ ՀՀ ոստիկանության Կոտայքի մարզային վարչության Նաիրիի բաժնում նախապատրաստված նյութերով հարուցվել է քրեական գործ»,- նշված է դատախազության տարածած հաղորդագրության մեջ։
ԲՀԿ–ականները հրաժարվո՞ւմ են կուսակցությունից. անդամատոմսերը հայտնվել են ջրում. տեսանյութ
Քրեական գործն ուղարկվել է Հատուկ քննչական ծառայություն՝ նախաքննություն կատարելու համար։