ԵՐԵՎԱՆ, 1 հուլիսի - Sputnik. Կորոնավիրուսի դեմ հակահամաճարակային միջոցառումների առաջին փուլում դիմակ դնելու անօգուտ լինելու մասին տեսակետը հնչեցրել է ոչ թե ՀՀ առողջապահության թիվ մեկ պատասխանատուն, այլ աշխարհի առողջապահության համար պատասխանատու թիվ մեկ կազմակերպությունը: Այսօր պարետատան նիստի ավարտին կայացած ճեպազրույցում, պատասխանելով լրատվամիջոցների հարցերին, ասաց վարչապետ Նիկոլ Փաշինյանը:
«Ի սկզբանե եղել է այսպիսի դիրքորոշում. դիմակ պետք է կրեն հիվանդներն ու նրանց խնամողները, որովհետև դիմակը պաշտպանում է ոչ թե վարակվելուց, այլ վարակելուց: Սա եղել է ԱՀԿ-ի արձանագրումը»,- ասաց Փաշինյանը:
Հետո, ըստ նրա, փոխվել է գիտելիք ու իրավիճակ, և այսօր բոլորը բոլորին պետք է վերաբերվեն որպես վարակվածի:
«Մենք էլի հիմնականում դիմակ կրում ենք ոչ այնքան ինքներս մեզ, որքան դիմացինին պաշտպանելու համար, որովհետև մենք ինքներս մեզ պետք է վերաբերվենք որպես վարակակրի»,- նշեց վարչապետը:
Փաշինյանն ընդգծեց նաև, որ համավարակի նախնական փուլում Հայաստանում դիմակի դեֆիցիտ կար:
Հայաստանում արտադրված կորոնավիրուսի թեստերը շուտով կհայտնվեն հիվանդանոցներում
«Երբ որ մենք ասեինք՝ դիմակ կրեք, իսկ դեղատներում դիմակ չկար, հարց չէ՞ր առաջանա, թե դա ինչ կոչ է: Դրա համար պետք էր նաև դիմակների սպառումը զսպել, որ գոնե հիվանդանոցներում բժիշկները կարողանային դիմակ ունենալ»,- պարզաբանեց նա:
Վարչապետը վկայակոչեց նաև աշխարհում կորոնավիրուսի տարածվածության պաշտոնական վիճակագրությունը:
«Աշխարհում այսօր կա 10 մլն-ից ավելի դեպք: Լավ, ենթադրենք՝ Հայաստանում առողջապահության նախարարությունը սխալ հայտարարություն է արել բա աշխարհի մնացած երկրներում ովքե՞ր են սխալ հայտարարություն արել:Համաճարակն աշխարհում տարածվում է: Ո՞մ սխալ հայտարարության, ո՞ւմ չարած գործի արդյունքում է այդ վարակը տարածվել»,- ասաց Փաշինյանը:
Հիշեցնենք՝ հունվարի 30-ին հրավիրված ասուլիսի ընթացքում ՀՀ առողջապահության նախարար Արսեն Թորոսյանը, պատասխանելով բժշկական դիմակներ կրելու վերաբերյալ լրագրողի հարցին, ասել էր․ «Այս պահին անհրաժեշտություն չկա, եթե լինի մենք կոչով հանդես կգանք»։
Բուժման հաջողված դեպք. «Նորք» տեղափոխված տղամարդու մոտ պրոգրեսիվ դինամիկա է գրանցվել
Մարտի 1-ի ասուլիսում Թորոսյանը նույնպես վերահաստատել էր, որ դիմակ դնելու իմաստ չկա։ 18 օր անց՝ մարտի 19-ի ասուլիսում նախարարը դարձյալ նույն համոզմանն էր․ «Սովորական բժշկական դիմակ կրելու իմաստ չկա, եթե վարակակիր կամ բուժաշխատող չես»:
Մինչդեռ մայիսի 14-ին կառավարությունը որոշեց, որ հանրային բաց տարածքներում դիմակի առկայությունը պարտադիր է: Իսկ չդնողները կտուգանվեն 10 000 դրամով:
Նրանք պայքարում են կորոնավիրուսային դժոխքում. մի քանի ժամ վերակենդանացման բաժանմունքում
