ԵՐԵՎԱՆ, 16 հուլիսի - Sputnik. Համացանցում տարածվում է Տավուշի մարզի Տավուշ գյուղից մի լուսանկար, որում փոքրիկ աղջիկը քնած է ապաստարանում։ Լուսանկարը հրապարակել է նաև Հայկական միասնական տեղեկատվական կենտրոնը Twitter-ում։
«Այս հուզիչ լուսանկարն արվել է այսօր Տավուշում: Երեխան քնած է ապաստարանում, քանի որ հակառակորդը հրետակոծում է խաղաղ բնակչությանը», - գրված է լուսանկարի տակ։
Լուսանկարում փոքրիկը փաթաթված է մի քանի ծածկոցով, հագին հողաթափեր են։ Լուսանկարի հեղինակ Նարեկ Ադամյանը Sputnik Արմենիայի հետ զրույցում ասաց, որ երեխային լուսանկարել և նկարը հրապարակել է ծնողների թույլտվությամբ։ Իսկ իր Facebook-ում Ադամյանը խնդրել է մարդկանց չանհանգստանալ երեխայի համար։
«Ստանում եմ բազմաթիվ զանգեր և արձագանքներ Տավուշ գյուղի ապաստարաններից մեկում քնած երեխային օգնություն ցույց տալու պատրաստակամության վերաբերյալ։ Երեխայի հարազատները փոխանցել են, որ անհանգստանալու կարիք չկա։ Տավուշցիները խրոխտ ժողովուրդ են, չափից շատ ուշադրությունը կարող է խոցել նրանց ինքնասիրությունը», - գրել է Ադամյանը։
Նա հավելել է, որ մարզային իշխանությունները օպերատիվ և համապարփակ կերպով արձագանքում են բոլոր խնդիրներին։
Ապրել ենք ուզում, բայց չեն թողնում. կյանքը Ադրբեջանին սահմանակից գյուղերում. լուսանկարներ
Հուլիսի 12–ից իրավիճակը սրվել է հայ–ադրբեջանական սահմանի Տավուշի հատվածում։ Հուլիսի 12–ին ժամը 12:30-ի սահմաններում, Ադրբեջանի զինված ուժերի զինծառայողները ՈւԱԶ մակնիշի ավտոմեքենայով Տավուշի ուղղությամբ ՀՀ պետական սահմանը խախտելու փորձեր են արել: Հայկական կողմի նախազգուշացումից հետո Ադրբեջանի զինծառայողները, թողնելով ավտոմեքենան, վերադարձել են իրենց դիրքեր:
Դրանից հետո հակառակորդը պարբերաբար վերսկսում է գնդակոծությունն ինչպես հայ դիրքապահների, այնպես էլ բնակավայրերի ուղղությամբ։
Հուլիսի 16-ին, 05:20-ից սկսած Տավուշի Այգեպար, Մովսես, Տավուշ և Չինարի գյուղերը հերթական անգամ հրետակոծվել են ադրբեջանական զինուժի կողմից։ Հրետակոծությունների հետևանքով վնասվել է Այգեպարի մանկապարտեզը, Չինարիում երեք բնակելի տուն, վիրավորվել է Չինարիի բնակիչ, 48-ամյա Արամայիս Հովակիմյանը։
Պատսպարվել թաքստոցներում և ապաստարաններում. Տավուշի մարզպետը դիմել է բնակիչներին
