ԵՐԵՎԱՆ, 21 հուլիսի – Sputnik. Մարդու իրավունքների պաշտպան Արման Թաթոյանը բուհերի ընդունելության հետ կապված բողոքների առնչությամբ դիմել է ՀՀ կրթության, գիտության, մշակույթի և սպորտի նախարար Արայիկ Հարությունյանին։
Ավելի վաղ հայտնել էինք, որ բուհերից դուրս մնացած ուսանողներն ու նրանց ծնողները բողոքի ակցիա են անցկացրել` դժգոհելով քննությունների արդյունքներից ու կրթական գերատեսչության նոր մոտեցումից։ Հարցն այն է, որ այս տարի կարևորվել է մասնագիտությունը, և առաջնայնությունը տրվել է ոչ թե որևէ առարկայից բարձր ստացողներին, այլ տվյալ մասնագիտությունն առաջին հայտով նշածներին։
ՄԻՊ–ը այս նոր կարգի վերաբերյալ նույնպես մի շարք դիմում-բողոքներ է ստացել։
«Դիմորդները և ծնողները մտահոգություններ են հայտնել, որ քննություններին մասնակցելու արդյունքում 12.0-ից 18.75 միավոր ստանալու պարագայում միավորները առաջին հայտով նշված բուհ ընդունվելուն չբավականացնելու պատճառով դիմորդները չեն ընդունվել կամ ընդունվել են 8-րդ հայտով նշված որևէ բուհ։ Նրանք հայտնել են, որ 7.5 միավոր ստացած մի շարք դիմորդներ 2-րդից 5-րդ հայտերով նշված բուհեր են ընդունվել»,–նշված է ՄԻՊ–ի հաղորդագրության մեջ, որը հրապարակվել է Facebook–ում։
Միաժամանակ ծնողները նաև լուծում են առաջարկել, օրինակ` այն, որ նախարարությունն ավելացնի բուհերում ուսուցման տեղերը, որպեսզի բարձր գնահատական ստացած դիմորդները կարողանան սովորել իրենց նախընտրած բուհում: Մեկ այլ տարբերակ էլ է առաջարկվել` դիմորդներին տալ 2020 ուսումնական տարվա առաջին կիսամյակում բուհում ընդգրկվելու հնարավորություն՝ հետագա կրթության շարունակականությունը սահմանելով մրցութային կարգով՝ ըստ գիտելիքի:
Հիշեցնենք, որ Հայաստանում այս տարի միասնական քննությունները մեկնարկեցին հուլիսի 2–ին և ավարտվեցին հուլիսի 8-ին։ Կորոնավիրուսային իրավիճակով պայմանավորված` դիմորդները միայն մեկ քննություն հանձնեցին բուհ ընդունվելու համար։
