ԵՐԵՎԱՆ, 27 հուլիս - Sputnik. Facebook-ի օգտատեր Արսեն Հարությունյանն իր էջում գրել է, որ կորոնավիրուսային կրկնավարակ գոյություն ունի, և ինքը նորից է վարակվել:
«Իմ նախորդ վարակումից մոտ 40 օր անց երեկ կրկին ախտորոշվեց Covid-19՝ այս անգամ արդեն երկկողմանի ինֆիլտրատիվ թոքաբորբով», - նշել է Հարությունյանը:
Նա ինքնամեկուսանալու կոչ է արել բոլոր այն մարդկանց, որոնց հետ շփվել է վերջին օրերին։
«Ես ինքս էլ չէի հավատում նման ժամկետներում երկրորդ անգամ վարակվելուն, բայց ունենք այն, ինչ ունենք։ Առողջ եղեք»,–ավելացրել է նա։
Sputnik Արմենիան այս գրառման առնչությամբ պարզաբանում խնդրեց ՀՀ առողջապահության նախարարությունից: Նախարարի մամուլի խոսնակ Ալինա Նիկողոսյանը նշեց, որ երկրորդ անգամ վարակվելու տարբերակը չի բացառվում:
Նրա խոսքով`մինչև հիմա չկան փաստեր, որոնք հաստատում կամ հերքում են կորոնավիրուսի կրկնավարակը: Հնարավոր է, որ հիվանդը լիարժեք չի ապաքինվել, այդ պատճառով էլ նրա կրկնակի թեստը դրական է եղել։
Հիշեցնենք` Հայաստանում կորոնավիրուսով վարակվածների թիվը վերջին մեկ օրում ավելացել է 73–ով և դարձել 37 390։ Ընդհանուր առմամբ, կորոնավիրուսից մահանալու 711 դեպք է գրանցվել։
