ԵՐԵՎԱՆ, 30 հուլիսի – Sputnik. Երևանի Արաբկիր վարչական շրջանի Կոմիտաս և Կասյան փողոցների հատման կետում փակված գյուղմթերքի շուկայի վաճառողներն այսօր հավաքվել են կառավարության շենքի դիմաց և պահանջում են վերականգնել քաղաքային ու համայնքային իշխանությունների որոշմամբ փակված շուկան։
«Մենք առևտրական չենք, գյուղացի ենք, արտադրող ենք»,– լրագրողների հետ զրույցում ասաց ակցիայի մասնակիցներից մեկը` հիշեցնելով, որ շուկան էլ ոչ թե շուկա է, այլ գյուղատնտեսական տոնավաճառ, որը միայն տոն օրերին է գործում։
Ակցիայի մասնակիցների խոսքով` գյուղմթերքի իրացման այդ հնարավորությունից զրկվելով` իրենք հայտնվել են ծանր իրավիճակում ու չեն կարողանում իրացնել ապրանքը։
Բանն այն է, որ քաղաքային իշխանությունների կողմից շուկայի գործունեության համար տրված թույլտվության ժամկետը 2020 թվականին ավարտվել է, և քաղաքապետարանը թույլտվության ժամկետը չի երկարացրել` իրենց ապրանքը վաճառող ֆերմերներին առաջարկելով տեղափոխվել կա՛մ Կոմիտասի ծածկած շուկա, կա՛մ «Հրազդան» մարզադաշտի տարածքում բացվող նոր տոնավաճառ։ Բայց վաճառողներն այս առաջարկը չեն ընդունում։
«Դա խնդրի լուծում չէ։ Դա որ որպես այլընտրանք են մեզ առաջարկում, մեր հաշվին է լինելու։ Մեր ապրանքի փչանալու հաշվին մենք պետք է նոր տոնավաճառ կայացնենք, այն էլ այս բերքի հասունացման սեզոնին»,– քաղաքապետարանի առաջարկին այսպես արձագանքեց կառավարության մոտ հավաքված ֆերմերներից մեկը։
Բողոքի ակցիայի մասնակիցները կառավարությանն առաջարկում են թույլ տալ իրենց հին տարածքում աշխատել ևս երկու ամիս` նախապես հայտարարելով, թե որ օրվանից շուկան ուր է տեղափոխվելու։ Վաճառողները վստահ են, որ սա յուրօրինակ իրազեկման ակցիա կլինի իրենց հաճախորդների համար ու նոր տեղ տեղափոխվելուց հետո իրենք չեն կորցնի հավատարիմ գնորդներին։
Կառավարությունն ու քաղաքային իշխանությունները, սակայն, ակցիայի մասնակիցների այս առաջարկին առայժմ չեն արձագանքել։
Երևանում զինվորական հոսպիտալի նախկին շենքի տեղում հյուրանոցային համալիր կկառուցվի
Հիշեցնենք, որ գյուղմթերքի տոնավաճառը Կոմիտաս և Կասյան փողոցների հատման կետում` Մհեր Մկրտչյանի անունը կրող հրապարակում, բացվել է 2011թ–ին և 9 տարի շարունակ գործել ամեն շաբաթ և կիրակի օրերին։ Քաղաքապետարանի որոշման ժամկետը լրանալուց հետո` հուլիսի 19-ին, ոստիկանությունն ու քաղաքապետարանը առևտրականներին թույլ չէին տվել աշխատել` փորձելով փակել շուկան, բայց ի վերջո տեղի էին տվել վաճառողների բողոքներին։
Կառավարությունը փորձում է լուծել անավարտ կառուցապատումներից տուժած բնակարանատերերի խնդիրը
Արաբկիր համայնքի ղեկավարությունը, Facebook-ում մեկնաբանելով քաղաքային իշխանության որոշումը, նշել էր, որ 9 տարի շարունակ հանգստյան օրերին կազմակերպվող գյուղմթերքի շուկան հարուցել է հարակից շենքերի բնակիչների դժգոհությունը։
Մինչդեռ նոր վայրում գյուղմթերքի առևտրի կազմակերպումն Արաբկիրի բնակիչներին կազատի բազմաթիվ անհարմարություններից։ Վարչական շրջանի ղեկավարությունն էլ հնարավորություն կունենա Մհեր Մկրտչյանի անվան հրապարակը մեծ արտիստին արժանի մշակութային հրապարակ դարձնելու։
Համայնքի ղեկավարության մեկնաբանմամբ, որոշումը պայմանավորված է եղել նաև հակասանիտարական վիճակով ու տրանսպորտային միջոցների տեղաշարժի սահմանափակումներով։
Կառավարությունը կվճարի սոցիալական կացարաններում բնակվող միայնակների կոմունալ վարձերը
