ԵՐԵՎԱՆ, 3 սեպտեմբերի - Sputnik. Սննդամթերքի անվտանգության տեսչական մարմինն ավարտել է Արմավիրի մարզում տնային պայմաններում արտադրված ու 11 մարդու մահվան պատճառ դարձած օղու լաբորատոր փորձաքննությունը։
Ինչպես հայտնում են ՀՀ Սննդամթերքի անվտանգության տեսչական մարմնից, փորձաքննությունը հաստատել է նախնական վարկածը, այն է՝ օղու մեջ առկա է մեթիլ սպիրտ, որի տոկոսը մի քանի անգամ գերազանցում է ԵԱՏՄ կանոնակարգերով հաստատված առավելագույն թույլատրելի չափաքանակը:
ՍԱՏՄ-ն կոչ է անում քաղաքացիներին զերծ մնալ անհայտ ծագման ոգելից խմիչքներ օգտագործելուց և հիշեցնում, որ անհայտ ծագման խմիչքների շրջանառությունը ՀՀ–ում արգելված է։
Հիշեցնենք` սեպտեմբերի 1-ին Սննդամթերքի անվտանգության տեսչական մարմնի աշխատակիցները, փորձաքննության նպատակով, նմուշառում են կատարել քաղաքացիների զանգվածային թունավորման ու 11 մարդու մահվան պատճառ դարձած տնայնագործ պայմաններում պատրաստված օղու բռնագրավված խմբաքանակից:
Նման բան 1-ին անգամ է պատահում. ինչու բժիշկներին չհաջողվեց փրկել խմիչքից թունավորվածներին
Դեպքից հետո ՀՀ ոստիկանությունը հայտարարեց, որ տնային պայմաններում պատրաստված շուրջ 200 լիտր օղի է հայտնաբերվել տուժածների մատնանշած հասցեում։ Հայտարարվեց նաև, որ մինչ այդ դրանից 30 լիտրն արդեն իսկ վաճառվել է տարբեր անձանց։
Արմավիրի բնակիչ, օղին պատրաստած և վաճառած 50-ամյա Աշոտ Հովսեփյանը ձերբակալվել է։ Ավելի ուշ հայտնի դարձավ, որ գործով ևս երկու մարդ է ձերբակալվել:
Թունավորման դեպքեր են գրանցվել նաև ՀՀ այլ բնակավայրերում։
Օգոստոսի 31-ից սեպտեմբերի 3-ի` ժամը 12:00-ի դրությամբ, հանրապետությունում արձանագրվել է ալկոհոլային թունավորման 38 դեպք, որից 25-ը` Արմավիրի մարզում, 12-ը` Երևանում, 1-ը` Կոտայքի մարզում:
