ԵՐԵՎԱՆ, 5 հոկտեմբերի – Sputnik. Գեղարքունիքի մարզպետ Գնել Սանոսյանը Facebook–ի իր էջում տեսանյութ ու լուսանկարներ է հրապարակել, որոնցում երևում է` ինչպես է ձյան բարակ շերտը ծածկել ճանապարհը:
«2020 թվականը շարունակվում է»,- գրել է նա:
Օգտատերերը շտապել են մեկնաբանություններում հարցնել, թե որտեղ են նկարահանել տեսանյութերը, բայց Սանոսյանը չի պատասխանել հարցերին:
Այնուամենայնիվ, օգտատերերը եզրակացրել են, որ ձյունը Գեղարքունիքի մարզում է տեղում, հնարավոր է` Գավառ քաղաքում:
«Սա տարի չէ, այլ պատիժ», «Ժամանակ գտավ», «Մնաց` այլմոլորակայիններն էլ գան, ու վերջ»,– այսպիսի մեկնաբանություններ են գրել մարզպետի էջի հետևորդները։
Նշենք, որ 2019 թվականին Հայաստանում առաջին ձյունը տեղացել է նոյեմբերի 2-ի գիշերը մի շարք մարզերում:
