ԵՐԵՎԱՆ, 9 հոկտեմբերի - Sputnik. Շուշիի Ղազանչեցոց եկեղեցու հրթիռակոծության ժամանակ վիրավորված ռազմական մեկնաբան Յուրի Կոտենոկի վիճակը ծանր է, բայց այս պահին նրա կյանքին վտանգ չի սպառնում: Այսօր լրագրողների հետ զրույցում տեղեկությունը հայտնեց «Էրեբունի» բժշկական կենտրոնի ղեկավար Միքայել Մանուկյանը։
Կոտենոկին այսօր «Էրեբունի» բժշկական կենտրոն են տեղափոխել սանավիացիայի ուղղաթիռով։ Եվս երկու ռուս լրագրողի տեղափոխել են առավոտյան 6-ին։
«Երեք լրագրող է տեղափոխվել մեզ մոտ։ Երկուսը ձախ ձեռքի վնասվածքներ ունեն։ Նրանց հաջողությամբ վիրահատել են Ստեփանակերտի բժշկական կենտրոնում։ Մենք արդեն մշակել ենք վերքերը։ Հիմա հիվանդասենյակներում են, նրանց վիճակը կայուն է», - ասաց Մանուկյանը։
Բժշկի խոսքով՝ Կոտենոկը բեկորային վնասվածք ունի կրծքավանդակի հատվածում և բավական շատ արյուն է կորցրել։ Նրան վիրահատել են Ստեփանակերտի հանրապետական հիվանդանոցում։
«Այժմ նա անհրաժեշտ հետազոտություններ կանցնի, ավելի ուշ վերակենդանացման բաժանմունք կտեղափոխվի բուժումը շարունակելու համար», — ասաց Մանուկյանը:
Բժիշկը հավաստիացրեց, որ բժշկական կենտրոնը լիովին պատրաստ է բուժումը կազմակերպել բարձր մակարդակով:
Մանուկյանի խոսքով` Ստեփանակերտում պրոֆեսիոնալ բուժօգնություն է ցուցաբերվել բոլոր պացիենտներին։ Արցախում են լավագույն մասնագետները, որոնք բարդ վիրահատություններ են իրականացնում` փրկելով վիրավորների կյանքը։
Հիշեցնենք` Կոտենոկը վիրավորվել էր երեկ, երեկոյան նրա վիճակը շատ ծանր էր։ Բացի նրանից, միջին ծանրության վնասվածքներ են ստացել նաև «Ռուսաստանի սպաներ» պորտալի հատուկ թղթակից Լևոն Արզանովը և նրանց ուղեկցող Հրանտ Բալադյանը:
Գիշերը լրագրողին կրկին վիրահատել են։ Նա մոտ 3,5 լիտր արյուն էր կորցրել, բայց բժիշկները կարողացել էին վերականգնել այն։ Կոտենոկը նաև վերքեր ունի որովայնի և վերջույթների հատվածում։
Ռուսաստանում Հայաստանի դեսպան Վարդան Տողանյանը երեկ Sputnik Արմենիային ասել էր, որ դեսպանությունը պատրաստ է ստանձնել Շուշիում հրթիռակոծության հետևանքով վիրավորված ռուս լրագրողի տեղափոխումը Մոսկվա, եթե դրա անհրաժեշտությունը լինի։
Արցախի Մարդու իրավունքների պաշտպանն այցելել է Շուշիի եկեղեցում վիրավորված լրագրողներին
