ԵՐԵՎԱՆ, 27 հոկտեմբերի - Sputnik. 1999 թվականի հոկտեմբերի 27-ի ոճրագործությանը զոհ գնացած ութ պետական գործիչները հենց այսօր են բոլորին անհրաժեշտ, քանի որ թրծված էին պատերազմական թոհուբոհում։ Լրագրողների հետ զրույցում հայտնեց Հոկտեմբերի 27-ի զոհերից Արմենակ Արմենակյանի կինը` Արմինե Արմենակյանը։
Հոկտեմբերի 27-ի ոճրագործությունից անցել է 21 տարի. այսօր Ազգային ժողովի բակում զոհերի հիշատակը հավերժացնող հուշակոթողի մոտ ԱԺ տարբեր խմբակցության պատգամավորները, զոհվածներ հարազատները ծաղիներ խոնարհեցին և հարգանքի տուրք մատուցեցին զոհերի հիշատակին։
«Հոկտեմբերի 27–ը մեծ ահաբեկչություն էր, որը մեր պատմության մեջ գրվեց սև տառերով։ Հիշում եմ, թե ինչպես մեր պետական և քաղաքական գործիչներն Արցախյան պատերազմում կարողացան հասնել հաղթանակի։ Ինչպես ամուսինս «Տիգրան Մեծ» ջոկատով կարողացավ հաղթանակով վերադառնալ, սակայն նրան սպանեցին այստեղ»,–ասաց տիկին Արմենակյանը։
Նա նշեց, որ մինչ այսօր առեղծված է Արմենակ Արմենակյանի մահը։ Տիկին Արմենակյանը կարծում է` ամուսնուն վախից են սպանել, քանի որ մտածել են` հետո վրեժխնդիր է լինելու նրանցից։ Ավելին, փաստաբանները մեկ այլ վարկած էլ են առաջ քաշել, որ բացի այդ արարքում մեղադրվող անձանցից, այլ մարդիկ էլ են գործի մեջ եղել, թիկունքից գործել։
Տիկին Արմենակյանը հայտնեց, որ դիմել են իշխանությանը, որ վերաբացվի Հոկտեմբերի 27-ի գործը, որպեսզի հասկանան` ովքեր են կանգնած մեղադրյալների թիկունքում։ Նրա խոսքով`երբ կավարտվի պատերազմը, ևս մեկ անգամ կդիմեն կառավարությանն այս հարցով։ Տիկին Արմենակյանը վստահ է` Հոկտեմբերի 27-ի գործով քննության տեղ կա։
Հիշեցնենք նաև, որ 1999թ-ի հոկտեմբերի 27-ին ոճրագործների խումբը` Նաիրի Հունանյանի գլխավորությամբ, ներխուժել էր ՀՀ Ազգային ժողովի նիստերի դահլիճ և սպանել ԱԺ խոսնակ Կարեն Դեմիրճյանին, վարչապետ Վազգեն Սարգսյանին, փոխխոսնակներ Յուրի Բախշյանին և Ռուբեն Միրոյանին, օպերատիվ հարցերով նախարար Լեոնարդ Պետրոսյանին, պատգամավոր Արմենակ Արմենակյանին, Հենրիխ Աբրահամյանին և Միքայել Քոթանյանին:
Ահաբեկիչների նկատմամբ դատական գործը սկսվեց 2001թ.-ի փետրվարին և տևեց մինչև 2003թ.-ի դեկտեմբերը։
Դատարանի որոշմամբ` Նաիրի Հունանյանը, նրա եղբայրը` Կարեն Հունանյանը, նրանց քեռին` Վռամ Գալստյանը, ինչպես նաև Դերենիկ Բեջանյանը, Էդիկ Գրիգորյանը և Աշոտ Կնյազյանը դատապարտվեցին ցմահ, Համլետ Ստեփանյանը` 14 տարվա ազատազրկման։
