ԵՐԵՎԱՆ, 14 նոյեմբերի - Sputnik. Երևանի Ազատության հրապարակում քիչ առաջ մեկնարկել է պատերազմի ընթացքում հերոսաբար զոհված հայորդիների հիշատակի մոմավառությունը։ Քաղաքացիների հոսքը չի դադարում։ Մարդիկ մոմեր են վառում ու դնում Օպերայի շենքի աստիճանների վրա։ Ազատության հրապարակը բազմամարդ է. հազարավոր մարդիկ են եկել հարգանքի և ոգեկոչման այս արարողությանը մասնակցելու։
Ազատության հրապարակում մոմավառության արարողությունից հետո քաղաքացիները երթով շարժվելու են դեպի Մատենադարան, որտեղ տեղի կունենա հոգեհանգստյան կարգ։ Նշենք, որ այսօր լռության և ոգեկոչման օր է հայտարարված։ Ընդդիմադիր քաղաքական ուժերը հայտարարել են, որ այսօր որևէ քաղաքական հայտարարություն չի հնչելու, որևէ գործողություններ չեն կատարվելու՝ ի հիշատակ մեր հերոսների։
Մոմավառության մասնակից քաղաքացիների աչքերին արցունքներ են։ Հուզմունքը չեն կարողանում զսպել նաև տղամարդիկ։
Շատերը ցուցանակներ են բարձրացրել, որոնց վրա զոհված զինծառայողների նկարներ են։
Այնուհետև մոմավառության մասնակիցները սկսեցին իրենց քայլերթը դեպի Մատենադարան։ Նրանք շարքի առջևից տանում են խաչ ու ՀՀ պետական դրոշը։ Հազարավոր քաղաքացիներ քայլում են մոմերը ձեռքերում պահած։
Կազմակերպիչներից մեկը քայլերթի ընթացքում բարձրաձայն կարդում է զոհված հերոսների անունները։ Նախատեսված է, որ մասնակիցները քայլերթով անցնելու են Հյուսիսային պողոտայով, Ամիրյան և Աբովյան փողոցներով։ Մասնակիցները հուզված են. ասում են՝ այս ցավը բոլորինս է։ Քայլերթի մասնակիցների թվում նաև հոգևորականներ կան։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
Նոյեմբերի 10-ի կեսգիշերին, ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն, ռազմական գործողությունները դադարեցվեցին։
Նոյեմբերի 14-ին ՀՀ առողջապահության նախարարությունը հայտնեց, որ դատաբժշկական ծառայությունը փորձաքննել է 2317 զոհված զինծառայողի դիակներ։
Զոհվածների մարմինների նույնականացման գործընթացը կատարվում է հնարավոր բոլոր միջոցներով. ՊՆ
