ԵՐԵՎԱՆ, 23 նոյեմբերի – Sputnik. ՀՀ փոխվարչապետ Տիգրան Ավինյանի գլխավորությամբ միջգերատեսչական հանձնաժողով կձևավորվի, որը շատ արագ պետք է զբաղվի անհետ կորած տղաների հարցերով։ Այս մասին ՀՀ վարչապետի օգնական Նաիրի Սարգսյանը հայտարարեց արցախյան պատերազմում անհետ կորած զինվորների ծնողների հետ զրույցում, որոնք բողոքի ակցիա էին իրականացնում, պահանջելով, որ իրենց երեխաների գտնվելու վայրի մասին տեղեկություն ստանան։
«Այսօր ժամը 14։00–ին ՀՀ վարչապետի մոտ ընդլայնված կազմով խորհրդակցություն է եղել հատուկ անհետ կորածների հարցով։ Վարչապետը որոշում է կայացրել, որ փոխվարչապետի գլխավորությամբ միջգերատեսչական հանձնաժողով ձևավորվի, որը շատ արագ պետք է զբաղվի անհետ կորած տղաների հարցերով և բոլոր ծնողներին անխտիր պատասխան տրվի, թե իրենց երեխաները որտեղ են գտնվում, ինչ վիճակում են և երբ է հնարավոր նրանց հայտնաբերել»,–ասաց Սարգսյանը։
Նրա խոսքով`վարչապետն իրեն հանձնարարել է, որ հանդիպում կազմակերպի անհետ կորած զինվորների ծնողների հետ։
Օգնեք գտնեմ եղբորս դիակը. միջադեպ` Գեղամ Մանուկյանի ճեպազրույցի ժամանակ
«Այդ պատճառով եմ այստեղ եկել, որպեսզի ձեր հեռախոսահամարները, տվյալները գրանցեմ և հենց վաղվանից հանդիպումներ կազմակերպենք, որպեսզի բոլորը կարողանան իրենց հարցերը բարձրացնել և դրանց պատասխան ստանալ։
Սակայն ծնողները բողոքի ձայն բարձրացրին, նշելով, որ 50 օր է, ինչ իրենց երեխաներից լուր չունեն, սակայն կառավարությունը դեռ նոր է որոշում հանձնաժողով ստեղծել։
Նշենք, որ ՊՆ–ի մոտ վաղ առավոտից հավաքվել են անհետ կորած զինծառայողների ծնողները։ Նրանք պահանջում են, որպեսզի պատասխանատու անձինք ընդունեն իրենց և հայտնեն` ուր են իրենց երեխաները։ Մասնավորապես, ծնողները պահանջում էին հանդիպում ՀՀ պաշտպանության նախկին նախարար Դավիթ Տոնոյանի ու փոխնախարար Տիգրան Բալայանի հետ։
Անհետ կորած զինծառայողների հարցով քննարկում կլինի. ի՞նչ են խոստանում ծնողներին