ԵՐԵՎԱՆ, 28 նոյեմբերի – Sputnik․ Ժամկետային զինծառայողների ծնողները բավարարված չեն վարչապետ Նիկոլ Փաշինյանի հետ հանդիպումից։ Նրանք այսօր կրկին կառավարության շենքի մոտ բողոքի ակցիա են անում։
«Երեկ հանդիպում եղավ 5 հոգանոց խմբով, բայց հանդիպման արդյունքները մեզ չբավարարեցին։ Վարչապետը խնդրել է 2 օր ժամանակ տալ, բայց բանակցող ծնողները դուրս էին եկել այն համոզմամբ, որ բացասական պատասխան է լինելու, դրա համար էլ այսօր նորից այստեղ ենք։ Մեր պահանջը նույնն է՝ վայրկյան առաջ Արցախից դուրս բերել մեր երեխաներին»,- լրագրողների հետ զրույցում նշեց բողոքող մայրերից մեկը՝ Լուսինե Հարոյանը։
Նրա խոսքով՝ ամեն օր նոր տեղեկատվություն է ստացվում այս կամ այն հանձնվող գյուղի մասին, մինչև այս պահը վստահ չեն՝ Բերձորը մնալո՞ւ է, թե՞ հանձնվելու է։ Մտավախություն ունեն՝ Բերձորն էլ կհանձնվի, իրենց որդիներն էլ փաստացի պատանդ կմնան Լեռնային Ղարաբաղում։
Կինը խոսեց նաև այն պայմանների մասին, որոնցում 44-օրյա դաժան պատերազմից հետո մնում են իրենց որդիները։
«Իմ որդին Ջաբրայիլում էր ծառայում, հրետանավոր է, մասնակցել է բոլոր ծանրագույն մարտերին՝ Ջաբրայիլում, Ֆիզուլիում, անգամ Շուշիում է եղել մինչև նոյեմբերի 10-ի առավոտյան 5-ը»,-նշեց կինը։
Նրա խոսքով՝ Ջաբրայիլում, Ֆիզուլիում ծառայած և ողջ մնացած զինծառայողներին տեղափոխել են հիմնականում Մարտունի։ Իր տեղեկություններով՝ տղաները գիշերում են մանկապարտեզում, դպրոցում, իսկ եթե դիրքերում են, ապա գիշերում են դրսում՝ սարսափելի ծանր պայմաններում։
Նիկոլ Փաշինյանի հետ հանդիպմանը մասնակցած ծնողներից մեկը նշեց՝ վարչապետը ժամանակ է ուզել մինչև նոյեմբերի 30-ը, որ բոլոր հարցերի պատասխանը տա։ Սակայն ծնողները պատրաստ չեն սպասել․ ասում են՝ 2 օրը երկար ժամանակ է, յուրաքանչյուր ժամը կարող է ճակատագրական լինել։
Նման արարքներով անհնար է զսպել համաժողովրդական բողոքի ալիքը. ՀՅԴ
Ծնողներից մեկն էլ նշում է՝ 18- 20 տարեկան երեխաներն անցել են դժոխքի միջով, հիմա նրանցից շատերը բուժօգնության կարիք ունեն։
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Համացանցում լուր տարածվեց, որ հայկական կողմն ունի 4750 զոհ ու անհետ կորած։ ՀՀ առողջապահության նախարար Արսեն Թորոսյանը նոյեմբերի 18-ին ԱԺ–ում լրագրողներին հայտնեց, որ պատերազմի առաջին օրվանից մինչև նոյեմբերի 17-ի երեկոյան պաշտոնապես հաստատված զոհված զինծառայողների թիվը 2425 է։
Նոյեմբերի 27-ի տվյալներով՝ Արցախի ՊԲ-ն հրապարակել է 1712 զոհվածների անունները։
Վերջին տվյալներով` քաղաքացիական անձանց շրջանում կա 50 զոհ ու 148 վիրավոր։
Ինչո՞ւ են ադրբեջանցիներն ուրախացել․ ռուսական խաղաղապահների հրամանատարի կենսագրությունը
