ԵՐԵՎԱՆ, 1 դեկտեմբերի – Sputnik. ՀՀ վարչապետ Նիկոլ Փաշինյանի հայտարարությունը ևս մեկ ապացույց էր, որ ՀՀ երկրորդ նախագահ Ռոբերտ Քոչարյանի դեմ քաղաքական հետապնդում է իրականացվում։ Լրագրողների հետ ճեպազրույցում նման կարծիք հայտնեց Քոչարյանի պաշտպան Հայկ Ալումյանը` անդրադառնալով Փաշինյանի՝ նոյեմբերի 30-ի գրառմանը։
Փաշինյանը երեկ անդրադարձել էր Քոչարյանի` պատերազմական օրերին Մոսկվա գնալու դեպքին։ Քանի որ Քոչարյանի անձնագիրն իր մոտ չէր, Փաշինյանն ասել է`թող միջնորդություն ներկայացնեն դատարան, ինքն էլ կխնդրի, որ մեղադրանքի կողմը չառարկի անձնագիրը վերադարձնելուն: Քոչարյանը, սակայն, Մոսկվա չգնաց, քանի որ կորոնավիրոսուով էր վարակվել։
«Փաշինյանի հայտարարությունը ևս մեկ ապացույց էր, որ դատախազությունը Փաշինյանի խամաճիկն է, և Քոչարյանի գործով ուղղակի կատարում է վարչապետի քմահաճույքները»,–ասաց Ալումյանը։
Հարցին, թե Փաշինյանի գրառումը կարո՞ղ է հիմք հանդիսանալ, որպեսզի պաշտպանները դատախազներին բացարկ հայտնեն, Հայկ Ալումյանը պատասխանեց, որ դեռ դեռ այդ հարցը չեն քննարկել, չնայած դատախազները բացարկման ենթակա են։ Ալումյանը նշեց` հաշվի առնելով, որ այս ամենը կատարվում գլխավոր դատախազի գիտությամբ և ուղղակի ցուցումներով, դժվար է պատկերացնել, թե գործով դատախազի փոփոխությունից ինչ պետք է փոխվի։
Քոչարյանի գրասենյակը ցույց է տալիս, որ գործող վարչապետը ստում է
«Ես այն կարծիքին եմ, որ դա պարզապես անօգուտ բան է։ Երբ ամեն ինչի հեղինակը գլխավոր դատախազն է, այդ ամենը դառնում է անիմաստ»,–ասաց Ալումյանը։
Նա հավելեց նաև, որ դեռևս 2018-ից հայտարարում են` Քոչարյանի դեմ քրեական գործի քողի տակ քաղաքական հետապնդում է իրականացվում նրա հանդեպ։ Այդ առնչությամբ, ըստ պաշտպանի, բազմաթիվ ապացույցներ են վկայակոչել` համացանցում հայտնված գաղտնալսման ձայնագրությունից մինչև դատարանների արգելափակում։
