ԵՐԵՎԱՆ, 1 դեկտեմբերի - Sputnik. Աշխատանքի և սոցիալական հարցերի նախկին նախարար, քաղաքական գործիչ Աղվան Վարդանյանն այսօր Sputnik Արմենիայի մամուլի կենտրոնում լրագրողների հետ հանդիպմանը խոսեց վարչապետ Նիկոլ Փաշինյանի վերջին կադրային փոփոխությունների մասին:
«Այսօր էլ Նիկոլը նոր նշանակումներ է անում ու ինչ-որ մեկն էլ այդ հրամանագրերը ստորագրում է: Այն մեկը, որ պահանջում էր Նիկոլի հրաժարականը: Աբսուրդ»,- ասաց Վարդանյանը:
Նա նաև հիշեցրեց, որ պատերազմից հետո Փաշինյանն ինքն էր ասում, թե իր կառավարության անդամներն ամեն ինչ հրաշալի են արել: «Այդ դեպքում ինչո՞ւ է փոխում և ումով է փոխում»,- ասաց Վարդանյանը՝ մեկ առ մեկ անդրադառնալով նաև նոր նշանակված պաշտոնյաների անձին:
Աղվան Վարդանյանը նորանշանակ նախարարներին համեմատեց ԱԹՍ-ների հետ՝ ասելով. «Բեսպիլոտնիկներ են. մեջը մարդ չկա, բայց ավերածություններ կարող են գործել»:
Էկոնոմիկայի նախարար Տիգրան Խաչատրյանը նույնպես հրաժարական տվեց
ԿԳՄՍ նորանշանակ նախարարին Աղվան Վարդանյանը բնորոշեց որպես «կռապաշտի», քանի որ նախկինում Դումանյանի կուռքը եղել է Լևոն Տեր-Պետրոսյանը, այսօր՝ Նիկոլ Փաշինյանը:
Վարդանյանը նաև շեշտեց, որ նշանակումից 3 oր առաջ Դումանյանը պահանջում էր Փաշինյանի հրաժարականը:
Իսկ պաշտպանության նախարարին Վարդանյանը կոչեց «Անդո Քոչարյանի թաշկինակ»՝ արձանագրելով, որ նա առաջնագծում երբեք չի եղել, իր գործունեությամբ ու խորհուրդներով վնասել է ԶՈւ-ին, խառնվել ռազմական մատակարարումներին:
«Վստահ չեմ, որ Վաղարշակ Հարությունյանը տարբերում է վառոդի ու սաունայի հոտերը»,- ասաց Վարդանյանը:
Իսկ Էկոնոմիկայի նորանշանակ նախարար, Menu.am-ի սեփականատիրոջը Աղվան Վարդանյանը ճանաչում է որպես նախկին ու ներկա բիզնեսները սնանկացրած գործարարի, ով, ինչպես պարզ է դարձել նրա վերջին հայտարարություններից, պատրաստվում է ներխուժել ադրբեջանական շուկա:
Արտգործնախարար Արա Այվազյանի մասին խոսելիս՝ Աղվան Վարդանյանը հիշեցրեց, որ նա հոկտեմբերին՝ պատերազմի օրերին, հետ է կանչվել Մեքսիկայից ու նշանակվել փոխարտգործնախարար:
Հիմա էլ, նրա խոսքով՝ «զբաղվում է Նիկոլի կնոջ հեռախոազանգերը կազմակերպելով»:
Դե, իսկ արտակարգ իրավիճակների նախարարը, Աղվան Վարդանյանի դիտարկմամբ, «ամոթալի պարտության հերոս-գեներալ» է, որին ինքն անձամբ չի ճանաչում:
