ԵՐԵՎԱՆ, 8 դեկտեմբերի – Sputnik. Աջափնյակն ու Դավթաշենը Երևանի առաջին վարչական շրջաններն են, որտեղ տեսակավորման համար նախատեսված թափոնամաններ են տեղադրվում: Տեղեկությունը հայտնում է Երևանի քաղաքապետ Հայկ Մարությանը` նշելով, որ «Կանաչապատում և շրջակա միջավայրի պահպանություն» ՀՈԱԿ-ը 16 կետերում երեքական տեսակի տարագույն թափոնամաններ կտեղադրի:
«Կենցաղային աղբի համար նախատեսված «սովորական» աղբամանների կողքին տեղադրված այս թափոնամանները հնարավորություն կտան մեր բնակչությանը՝ աստիճանաբար յուրացնել աղբի տեսակավորման մշակույթը՝ առանձնացնել այն տանը և թափել բնակարանի մերձակայքում տեղադրված ամաններում»,– Facebook–ի իր էջում գրել է նա:
Աջափնյակի թաղապետը դիմում է գրել Մարությանին. նա խնդրում է չքաղաքականացնել
Մարությանի խոսքով` դեռ 2019-ից պլանավորված այս գործընթացը մի քանի կարևորագույն նպատակ է հետապնդում՝ սկսած բնապահպանականից, վերջացրած՝ տնտեսական որոշակի արդյունքով:
«Այսպիսով, եթե տեսնեք ձեր շենքի մոտակայքում տեղադրված նոր թափոնամանները, իմացեք, որ դեղինը նախատեսված է թղթի, ստվարաթղթի համար: Խիստ ցանկալի է, որ ստվարաթղթե արկղերը թափոնամանները նետվեն բացելուց և ծալելուց հետո: Կապույտը պլաստիկի համար է: Այս թափոնամանները նախատեսված են բոլոր այն թափոնների համար, որոնք պլաստիկի հիմքով են պատրաստված՝ պոլիէթիլենային տոպրակներ, շշեր, բաժակներ և այլն։ Փոքր մոխրագույն/սև թափոնամանները ապակու համար են: Այստեղ հավաքում ենք ապակե թափոնները՝ ոչ միայն շշերը և այլ սպասք, այլև օրինակ՝ պատուհանի կոտրված ապակի, և այլն»,– նշել է քաղաքապետը:
Մարությանի խոսքով` մասնագետներն ու վարչական շրջանների համապատասխան անձնակազմը թափոնամաններից օգտվելու առանձնահատկությունների մասին ընթացքում առավել մանրամասն տեղեկատվություն կտան։
Չխանգարենք ոչ մեկին․ ՀՀ ոստիկանությունը քաղաքացիներին կոչ է հղել
