ԵՐԵՎԱՆ, 9 դեկտեմբերի – Sputnik. ՀՀ Ազգային ժողովում կառավարության անդամների հետ հարցուպատասխանի ժամանակ «Լուսավոր Հայաստան» խմբակցության անդամ Տարոն Սիմոնյանը վարչապետ Նիկոլ Փաշինյանին հարց ուղղեց` հայտնի եռակողմ փաստաթուղթը սպառնալիքի տակ է կնքե՞լ, թե՞ կամքի դրսևորում է։
Սիմոնյանը նշեց, որ այդ փաստաթղթով խախտվում են միջազգային իրավունքն ու ՀՀ Սահմանադրությունը։
Նիկոլ Փաշինյանը, սակայն, պատասխանեց, որ դրա ստորագրման հանգամանքների վերաբերյալ արդեն իսկ պարզաբանումներ տվել է և ավելացնելու համար նոր բան չկա:
«Ձեր խոսքում հակասություն կա. մի կողմից ասում եք, որ իրավական փաստաթուղթ չէ, մյուս կողմից ասում եք, որ իրավական փաստաթուղթ է: Եվս մեկ անգամ կրկնում եմ` այն հրադադարի և ռազմական գործողությունների մասին փաստաթուղթ է, որը ստորագրվել է` հաշվի առնելով տվյալ պահը»,–ասաց Փաշինյանը։
Տարոն Սիմոնյանը հետաքրքրվեց նաև, թե ինչո՞ւ քայլեր չեն արվում միջազգային իրավունքի նորմերին համապատասխան Ադրբեջանին պատժելու այն հանցագործությունների համար, որն իրականացվում է ՀՀ քաղաքացիների հանդեպ։
Երևանում երթեր են ընթանում Նիկոլ Փաշինյանի հրաժարականի պահանջով
Ի պատասխան վարչապետը նշեց, որ բոլոր դեպքերով քննություն է արվում և բոլոր փաստերը հավաքագրվում են ոչ միայն հայաստանյան, այլ նաև միջազգային ատյաններում։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։
Հայաստանն ապահովում է տրանսպորտային կապ Ադրբեջանի արևմտյան շրջանների և Նախիջևանի Ինքնավար Հանրապետության միջև։
Ինչ տվեց Արցախի վերաբերյալ եռակողմ հայտարարությունը․ քարտեզ
Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր 1960 զինվորականի չափով, հրազենային զենքով, 90 զրահատրանսպորտային և 380 ավտոմեքենաներով և հատուկ տեխնիկայով։
Խաղաղապահները մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։
Նշվում է նաև, որ ներքին տեղահանվածները և փախստականները վերադառնում են ԼՂ և հարակից շրջաններ, իրականացվում է ռազմագերիների փոխանակություն և մյուս պահվող անձանց փոխանակություն, ապաարգելափակվում են բոլոր տնտեսական և տրանսպորտային կապերը տարածաշրջանում։
