ԵՐԵՎԱՆ, 9 դեկտեմբերի – Sputnik. Սոթքի հանքավայրի վարչական շենքը գտնվում է հայկական կողմում։ ԱԺ–ում կառավարության հետ հարցուպատասխանի ժամին ասաց փոխվարչապետ Տիգրան Ավինյանը` պատասխանելվ հարցին, թե ինչ ճակատագիր կունենա հանքը։
«Սոթքի հանքավայրի առնչությամբ որոշակի ճշգրտում է տեղի ունեցել, և հանքավայրի մի հատվածքում Հայաստանի և Ադրբեջանի ԶՈւ–երը ավելի ճշգրիտ են տեղավորվել։ Հանքի շահագործման հարցերն ունեն իրավական հիմնավորումներ, դրանք նույնպես բանակցային գործընթացի հարցեր են և առաջիկայում կքննարկվեն»,–ասց Ավինյանը։
Նրա խոսքով` սահմանազատման աշխատանքների համար հաշվի են առնելու 1938 թվականից առաջ ստեղծված քարտեզներով ամրագրած տարածքները, քանի որ 28-29 թվականների քարտեզներն ընդունված են եղել այդ ժամանակ երկու երկրների կողմից։ Սա, սակայն, չի նշանակում, որ այլ քարտեզներ չեն քննարկվելու։
Ավինյանը հավելեց նաև, որ ՀՀ ԶՈւ–ն և ռուս խաղաղապահները բոլոր հատվածներում մասնակցում են սահմանազատման աշխատանքներին։
Հիշեցնենք` նոյեմբերի 26-ին լուրեր տարածվեցին, որ ադրբեջանական զինվորները մտել են Սոթքի հանքավայր և աշխատակիցներին ժամանակ տվել դուրս գալու համար: ՀՀ պաշտպանության նախարարությունը հերքեց այդ լուրը։ Գեղամասար խոշորացված համայնքի (որտեղ ներառված է նաև Սոթքը) ղեկավար Հակոբ Ավետյանը Sputnik Արմենիայի հետ զրույցում հայտնեց, որ ադրբեջանցիները Սոթքի հանքի տարածքում են, բանակցություններ են վարում։
Sputnik Արմենիայի նկարահանող խումբը հաջորդ օրը մեկնեց Սոթք և տեսավ, որ դեպի Քարվաճառ ու հանքի տարածք գնացող ճանապարհին կանգնած են ՀՀ ոստիկանության ու ռազմական ոստիկանության աշխատակիցները, որոնք բացի զինվորականներից ու հանքի աշխատակիցներից, այլ անձանց թույլ չէին տալիս շարունակել ճանապարհը դեպի ոսկու հանք:
