ԵՐԵՎԱՆ, 7 հունվարի - Sputnik. Երևանում վերջին օրերի սառնամանիքների պատճառը օդի բարձր հարաբերական խոնավությունն է։ ՀՀ ՇՄՆ Հիդրոօդերևութաբանության և մոնիտորինգի կենտրոնի տնօրենի տեղակալ Գագիկ Սուրենյանը Facebook–ի իր էջում գրառում է կատարել՝ մեկնաբանելով մայրաքաղաքային անսովոր ցուրտը։
«Երևանում -10 է, բայց -20 աստիճանանին հավասար ցուրտ է, պատճառը բարձր հարաբերական խոնավությունն է»,- գրել է Սուրենյանը։
Նշենք, որ ըստ եղանակային կանխատեսումների՝ Երևանում նվազագույն ջերմատիճանը դիտվում է գիշերային ժամերին՝ -10 ։
Ցերեկային ժամերին ջերմաստիճանը տաքանում է մոտ 4 աստիճանով, ապա կրկին նվազում։ Այս օրերին մայրաքաղաքում օդի խոնավությունը 100 տոկոս է։
Արդեն մի քանի օր է՝ պահպանվում է ամպամածություն և մառախուղ։
Հավելենք, որ Սուրենյանի գրառման ներքո կարճ ժամանակում երկու հարյուրից ավելի մեկնաբանություններ են հայտնվել, մեծ մասը՝ զավեշտալի.
- «Սաղ նախկիններն են մեղավոր»։
- «Բա Սերժի վախտ ինչի՞ սենց թվեր չէիք խփում»։
- «Մինչև Արծրունը չասի, չեմ հավատա»։
- «Սուրենյանի էջը կոտրել են, ժողովուրդ, մի՛ տրվեք սադրանքներին»։
- «Շատ լավ ա, ձեզ հասնում ա, պարոն Սուրենյան, հազար անգամ ասեցի՝ էդ պուլտը ուղարկեք Ռուսաստան, եղանակը կարգավորենք, հիմա էլ մեր ցուրտը ուղիղ չվերթով եկել ա ձեր մոտ»։
- «Սուրենյան, փրկեա մեզի էս ցրտեն»։
- «Ջերմացրու երկիրս, Սուրենյան ջան, մի լավ բան ասա, տաքանանք»։
- «Մառախուղ ցրող Գագիկ Սուրենյանին եմ պահանջում»։
- «Լկտի սուտ է։ Հետևեք միայն պաշտոնականին»։
- «Եկել է Սուրենյանի վրեժի ժամանակը»...
Զավեշտալի մեկնաբանությունների տարափը շարունակվում է։ Օգտատերերը փորձում են ձմեռային ցուրտը «կոտրել» հումորով
«Ապակիներին կպնեինք, կտրաքեր». Սուրենյանը հայտնում է` Աշոցքում -25 աստիճան է գրանցվել
