ԵՐԵՎԱՆ, 22 հունվարի – Sputnik. Նախկին զինդատախազ, ԲԴԽ անդամի թեկնածու Գագիկ Ջհանգիրյանը կարծում է, որ չի կարելի վերցնել եվրոպական երկրներից մեկում առկա որևէ մարմին ու այն ներդնել Հայաստանում։ Ջհանգիրյանը նման կարծիք հայտնեց ԱԺ–ում ընթացող արտահերթ նիստի ժամանակ` պատասխանելով հարցին, թե ինչպես է վերաբերվում իշխանության` հակակոռոիպցիոն դատարանների ստեղծման առաջարկին։
«Պետք է գնալ ճիշտ ճանապարհով։ Գնում ենք Եվրոպա, տեսնում ենք մի մարմին ու որոշում այստեղ էլ ներդնել այն։ Չի կարելի այդպես անել։ Կարծում եմ, որ պետք է նախաքննությունը մասնագիտացնել մեկ մարմնի շրջանակներում»,–ասաց Ջհանգիրյանը։
Նրա խոսքով` դեռևս նախորդ իշխանությունների օրոք, օրինակ, 2006-2007-ին ներքին գործերից քննչական ապարատը հանվեց և ստեղծվեց քննչական կոմիտեն։ Ըստ նրա` այն քննչական մարմինները, որոնք գտնվում են հզոր, օպերատիվ հետախուզական մարմինների կառույցում, դրանց նախաքննության նկատմամբ դատախազական հսկողությունը ֆորմալ է։ Քննիչն իր ուսադիրներով, աշխատավարձով և հավելավճարով, ինչպես նշեց Ջհանգիրյանը, կախված է իր ղեկավարից։
Ուստի, Ջհանգիրյանը կարծում է, որ ոչ թե պետք է կոռուպցիոն դատարաններ ստեղծվեն, այլ հակառակ ուղղությամբ գնա պրոցեսը` նախաքննական մարմինները պետք է հանվեն գերատեսչությունների կառույցից։
Անդրադառնալով Գերագույն դատարան ստեղծելու հարցին` Ջհանգիրյանը նշեց, որ դեմ է դրան և կարծում է՝ սխալ ճանապարհով են գնում, դա փակուղի է:
ԼՀԿ–ն չի մասնակցի Ջհանգիրյանի և Խաչատուրյանի քվեարկությանը. Սիմոնյանը բացատրեց` ինչու
«Բացասական եմ վերաբերվում, որովհետև դրանք կայացած կառույցներ են, եթե ինչ-ինչ խնդիրներ կան այդ կառույցների գործունեության բովանդակության մեջ, պետք է լուծենք այդ խնդիրները: Կոպիտ օրինակ բերեմ, եթե ուզում ենք խաշ ուտենք, կաթ տվող կովին չենք մորթում, որ ոտքերից խաշ ուտենք: Այդ մարմինները՝ ՍԴ, Վճռաբեկ դատարան, գործում են տարիներ շարունակ»,–ասաց նա։
Ջհանգիրյանի խոսքով` գերագույն դատարանը «մոնստր» է` իր կազմում ուներ և առաջին ատյան, և վերանայման ատյան, և հսկողական ատյան:
Այսինքն՝ կենտրոնացած էր, կարևոր գործերն իրենց մոտ էր, իսկ ժողովրդական դատարանները «դամ էին քաշում»:
