ԵՐԵՎԱՆ, 25 հունվարի – Sputnik. Օդանավակայանի աշխատակից քրեական հետախույզը 400 եվրո է հափշտակել բերման ենթարկված հետախուզվողից ու բռնվել է։
Ոստիկանության մամուլի ծառայությունը տեսանյութ է հրապարակել, որը ներկայացնում է, թե ինչպես է օպերլիազորը հետախուզվողից գումար գողացել։ Հափշտակության մասին տեղեկությունները ստացվել են ոստիկանության ներքին անվտանգության վարչությունում․ ծառայողները ձեռնարկել են անհրաժեշտ գործողություններ՝ դրանց իսկությունը պարզելու և հիմնավորելու համար։
Խոշոր գողություն Արտաշատում. կասկածյալներից մեկի ոտքերը կոտրվել են փախուստի ժամանակ
Արդյունքում պարզվել է, որ հունվարի 8-ին Երևան է ժամանել միջազգային մակարդակով հետախուզվող՝ Իրանի Իսլամական Հանրապետության մի քաղաքացի։
«Նա բերման է ենթարկվել ոստիկանության «Զվարթնոց» օդանավակայանի գծային բաժին ու խուզարկվել։ Ի թիվս այլ իրերի՝ հայտնաբերվել է նաև 1200 եվրո։ Փողը փաթեթավորվել է։ Գծային բաժնի քրեական հետախույզը, Իրանի քաղաքացուն քրեակատարողական հիմնարկ տեղափոխելիս, փաթեթավորված գումարից հափշտակել է 400 եվրո»,- տեղեկացնում են ոստիկանությունից։
Դեպքի առթիվ ոստիկանության ներքին անվտանգության վարչությունում նախապատրաստված նյութերն ուղարկվել են Հատուկ քննչական ծառայություն։ Հունվարի 21-ին ՀՔԾ-ում արդեն քրեական գործ է հարուցվել։ Հանգամանքները պարզվում են։
