ԵՐԵՎԱՆ, 2 փետրվարի – Sputnik. «Ճամփորդում եմ առանց COVID-19» հավելվածի հետ կապված խնդիրներ «Զվարթնոց» օդանավակայանում այլևս չեն ծագել։ Տեղեկությունը Sputnik Արմենիայի թղթակցի հետ զրույցում հայտնեց օդանավակայանի մամուլի քարտուղար Սաթենիկ Հովհաննիսյանը։
Ինչպես արդեն տեղեկացրել ենք, նախօրեին Հայաստանի մոտ 20 քաղաքացիներ չեն կարողացել մեկնել Մոսկվա։ Ոմանց չէր հաջողվել ներբեռնել հավելվածը, մյուսների թեստի պատասխանը չէր եկել, երրորդները պարզապես չգիտեին, որ թեստը պետք է հանձնել բացառապես «Ճամփորդում եմ առանց COVID-19» հավելվածի ցանկում ընդգրկված լաբորատորիաներում։
«Գիշերվանից սկսած չի եղել դեպք, որ ուղևորների մոտ որևէ խնդիր առաջանա, կամ նրանք թեստի պատասխանը տան այն լաբորատորիայում, որը կցված չի հավելվածին կամ դեռ լիցենզիա չի ստացել»,-ասաց Հովհաննիսյանը:
Այսօր Հայաստանից Ռուսաստան իրականացվել է չորս չվերթ, որոնցից մեկը՝ Սամարա, երեքը՝ Մոսկվա։
Հայաստանի քաղաքացիները փետրվարի 1-ից կարող են մեկնել Ռուսաստան կորոնավիրուսային վարակի բացասական թեստի առկայության դեպքում: Սակայն մեկնելուց առաջ նրանք պետք է «Ճամփորդում եմ առանց COVID-19» հավելվածը ներբեռնեն բջջային հեռախոսի մեջ, կորոնավիրուսային վարակի թեստ հանձնեն այն լաբորատորիաներում, որոնք ներառված են այս ծրագրի ցանկում:
Բացասական թեստի դեպքում հավելվածը տալիս է «կանաչ» պատուհան՝ ազատ տեղաշարժի ազդանշան։
Նախարարությունը պարզաբանում է, թե ինչ է կատարվել «Զվարթնոց» օդանավակայանում
Փետրվարի 1-ի ժամը 17:35-ի դրությամբ «ճամփորդում եմ առանց COVID-19» հավելվածը սմարթֆոններում տեղադրել է 18 հազար 500 օգտատեր Հայաստանից: Ծրագրում ընդգրկված են «Ցիտո», «Նորմեդ», «Նատալի Ֆարմ», «Աստղիկ» և «Բիոմեդ», «ՊՐՈՄ-թեստ», «Էկոսենս», «Գիսանե» բժշկական կենտրոնների վեց լաբորատորիաներ: Աշխատանքներ են տարվում լաբորատորիաների ցանկի ընդլայնման ուղղությամբ։ Եվս երեք լաբորատորիա գնահատվել է, ամենայն հավանականությամբ, դրանք էլ շուտով կընդգրկվեն հավելվածում։
