ԵՐԵՎԱՆ, 4 փետրվարի – Sputnik. ՀՅԴ երիտասարդները հերթական բողոքի ակցիան են անցկացնում կառավարության շենքի մոտ։ Այս անգամ ակցիան խորհրդավոր ձևով մեկնարկեց։ Կառավարության շենքին մոտեցան բժշկական սպիտակ խալաթներով երկու աղջիկներ՝ իրենց հետ բերելով անվասայլակ։ Նրանց ուղեկցող կինն ասաց, որ կառավարությունից կանչ են ստացել, դրա համար են եկել։
«Կառավարությունից կանչ ենք ստացել, որ պետք է գանք, մեր գժին տանենք, ներս չեն թողնում»,- լրագրողների հետ զրույցում ասաց կինը։
Դրանից հետո բարձրախոսով ակտիվիստներից մեկը հայտարարեց, որ բժիշկները եկել են «երկրի գերագույն գլխավոր խելագարին բուժման տանելու»։ Երիտասարդի ակտիվիստի խոսքով՝ իրենք հույս ունեն, որ կառավարության շենքի ներսում ադեկվատ մարդիկ կգտնվեն, կգնահատեն երկրի վարչապետի հոգեկան անկայուն վիճակը։
«Կա մարդ, ով որ այսօր զբաղեցնում է ՀՀ վարչապետի պաշտոնն ու ունի հոգեկան խնդիրներ»,- լրագրողների հետ զրույցում նշեց երիտասարդը։
«Դավաճանը պետք է հեռանա», «Նիկոլ, դավաճան»․ նման պաստառներով կառավարության շենքի մոտ եկած երիտասարդները պահանջում են վարչապետ Նիկոլ Փաշինյանի հրաժարականը։ Նրանք վստահ են, որ միայն վարչապետի հրաժարականից հետո մեր երկիրը հնարավորություն ունի ոտքի կանգնելու, վերականգնվելու և զարգանալու։
«Եթե իրավիճակը շարունակի այսպես մնալ, եթե այս դավաճան, ապաշնորհ, Հայաստանի շահերին հակասող կառավարությունը շարունակի պաշտոնավարել, Հայաստանը դատապարտված է, մեր ֆիզիկական գոյությունն այստեղ վտանգված է»,- նշեց ՀՅԴ ՀԵՄ անդամ Քրիստինե Վարդանյանը։
Քոչարյանը Մանուկյանի փոխարե՞ն. փորձագետներն ընդդիմության ձևաչափի փոփոխում են կանխատեսում
Նրա խոսքով՝ այսօրվա ակցիայի կազմակերպիչների ուղերձը շատ պարզ է․ երկիրն այս պահին ղեկավարում է հոգեպես անհավասարակշիռ մարդը, որը պետք է օր առաջ հեռանա։
Նշենք, որ թեպետ ակցիայի մասնակիցները թիվը մեծ չէ, բայց կառավարության շենքն արդեն մի քանի տասնյակ ոստիկաններ են պաշտպանում։
